1089. යෙ මෙ පුබ්බෙ වියාකංසු (ඉච්චායස්මා හෙමකො)
හුරං ගොතම සාසනං,
ඉච්චාසි ඉති භවිස්සති
සබ්බං තං ඉතිහීතිහං
සබ්බං තං තක්කවඩ්ඪනං
නාහං තත්ථ අභිරමිං.

1090. ත්වඤ්ච මෙ ධම්ම මක්ඛාහි තණ්හා නිග්ඝාතනං මුනි,
යං විදිත්වා සතො චරං තරෙ ලොකෙ විසත්තිකං.

1091. ඉධ දිට්ඨ සුත මුත විඤ්ඤාතෙසු පියරූපෙසු හෙමක,
ඡන්දරාග විනොදනං නිබ්බාන පද මච්චුතං.

1092. එතදඤ්ඤාය යෙ සතා දිට්ඨධම්මාභිනිබ්බුතා,
උපසන්තා ච තෙ සදා තිණ්ණා ලොකෙ විසත්තිකන්ති.

1093. යස්මිං කාමා න වසන්ති (ඉච්චායස්මා තොදෙය්යා)
තණ්හා යස්ස න විජ්ජති,
කථංකථා ච යො තිණ්ණො විමොඛො තස්ස කීදිසො.

1094. යස්මිං කාමා න වසන්ති (තොදෙය්යාති භගවා)
තණ්හා යස්ස න විජ්ජති,
කථංකථා ච යො තිණ්ණො විමොඛො තස්ස නාපරො.

1095. නිරාසසො සො උදි ආසසානො
පඤ්ඤාණවා සො උදපඤ්ඤකපපී,
මුනිං අහං සක්ක යථා විජඤ්ඤං
තං මෙ වියාචික්ඛ සමන්තචක්ඛු.

1096. නිරාසසො සො න සො ආසසානො
පඤ්ඤාණවා සො න ච පඤ්ඤකප්පී,
එවම්පි තොදෙය්ය මුනිං විජාන
අකිඤ්චනං කාමභවෙ අසත්තන්ති.

1097. මජ්ඣෙ සරස්මිං තිට්ඨතං (ඉච්චායස්මා කප්පො.)
ඔඝෙ ජාතෙ මහබ්භයෙ,
ජරාමච්චුපරෙතානං දීපං පබ්රූහි මාරිස;
ත්වඤ්ච මෙ දීපමක්ඛාහි යථායිදං නාපරා සියා

1098. මජ්ඣෙ සරස්මිං තිට්ඨතං (කප්පාති භගවා)
ඔඝෙ ජාතෙ මහබ්භයෙ,
ජරාමච්චුපරෙතානං දීපං පබ්රූමි කප්ප තෙ.

1099. අකිඤ්චනං අනාදානං එතං දීපං අනාපරං,
නිබ්බානමිති තං බ්රූමි ජරාමච්චුපරික්ඛයං.

1100. එතදඤ්ඤාය යෙ සතා දිට්ඨධම්මාභිනිබ්බුතා,
න තෙ මාරවසානුගා න තෙ මාරස්ස පද්ධගූති.