1101. සුත්වාන’හං චිරං අකාමකාමිං (ඉච්චායස්මා ජතුකණ්ණි)
ඔඝාතිගං පුට්ඨු මකාමමාගමං,
සන්තිපදං බ්රූහි සහාජනෙත්ත
යථාතච්ඡං භගවා බ්රූහි මෙතං.

1102. භගවා හි කාමෙ අභිභුය්ය ඉරීයති
ආදිච්චොව පඨවිං තෙජි තෙජසා,
පරිත්තපඤ්ඤස්ස මෙ භූරිපඤ්ඤ,
ආචික්ඛ ධම්මං යමහං විජඤ්ඤං
ජාතිජරාය ඉධ විප්පහානං.

1103. කාමෙසු විනය ගෙධං (ජතුකණ්ණීති භගවා)
නෙක්ඛම්මං දට්ඨු ඛෙමතො,
උග්ගහීතං නිරත්තං වා මා තෙ විජ්ජිත්ථ කිඤ්චනං.

1104. යං පුබ්බෙ තං විසොසෙහි පච්ඡා තෙ මාහු කිඤ්චනං,
මජ්ඣෙ චෙ නො ගහෙස්සසි උපසන්තො චරිස්සසි.

1105. සබ්බසො නාම රූපස්මිං වීතගෙධස්ස බ්රාහ්මණ,
ආසවාස්ස න විජ්ජන්ති යෙහි මච්චු වසං වජෙති.

1106. ඔකං ජහං තණ්හච්ඡිදං අනෙජං (ඉච්චායස්මා භද්රාවුධො)
නන්දිං ජහං ඔඝතිණ්ණං විමුත්තං,
කප්පං ජහං අභියාචෙ සුමෙධං
සුත්වාන නාගස්ස අපනමිස්සන්ති ඉතො.

1107. නානා ජනා ජනපදෙහි සඞ්ගතා
තව වීර වාක්යං අභිකඞ්ඛ මානා,
තෙසං තුවං සාධු වියාකරොහි
තථා හි තෙ විදිතො එස ධම්මො.

1108. ආදානතණ්හං විනයෙථ සබ්බං (භද්රාවුධාති භගවා)
උද්ධං අධො තිරියඤ්චාපි මජ්ඣෙ,
යං යං හි ලොකස්මිං උපාදියන්ති
තෙනෙව මාරො අන්වෙති ජන්තුං.

1109. තස්මා පජානං න උපාදියෙථ
භික්ඛු සතො කිඤ්චනං සබ්බලොකෙ,
ආදානසත්තෙ ඉති පෙක්ඛමානො
පජං ඉමං මච්චුධෙය්යෙ විසත්තංන්ති.

1110. ඣායිං විරජමාසීනං (ඉච්චා යස්මා උදයො)
කතකිච්චං අනාසවං
පාරගුං සබ්බධම්මානං අත්ථි පඤ්හෙන ආගමං,
අඤ්ඤා විමොක්ඛං පබ්රූහි අවිජ්ජාය පභෙදනං.

1111. පහානං කාමච්ඡන්දානං (උදයාති භගවා)
දොමනස්සානං චූභයං,
ථිනස්ස ච පනූදනං කුක්කුච්චානං නිවාරණං.

1112. උපෙඛා සති සංසුද්ධං ධම්මතක්කපුරෙජවං,
අඤ්ඤා විමොක්ඛං පබ්රූමි අවිජ්ජාය පභෙදනං.

1113. කිංසු සංයොජනො ලොකො (ඉච්චායස්මා උදයො)
කිංසු තස්ස විචාරණා,
කිස්සස්ස විප්පහානෙන නිබ්බානමිති වුච්චති.