784. වදන්ති වෙ දුට්ඨමනාපි එකෙ
අථොපි වෙ සච්චමනා වදන්ති,
වාදඤ්ච ජාතං මුනිනො උපෙති
තස්මා මුනි නත්ථි ඛිලො කුහිඤ්චි.

785. සකං හි දිට්ඨිං කථමච්චයෙය්ය
ඡන්දානුනීතො රුචියා නිවිට්ඨො,
සයංසමත්තානි පකුබ්බමානො
යථා හි ජානෙය්ය තථා වදෙය්ය.

786. යො අත්තනො සීලවතානි ජන්තු
අනානුපුට්ඨො ච පරෙස පාවා,
අනරියධම්මං කුසලා තමාහු
යො ආතුමානං සයමෙව පාවා

787. සන්තො ච භික්ඛු අභිනිබ්බුතත්තො
ඉති’හන්ති සීලෙසු අකත්ථමානො,
තමරියධම්මං කුසලා වදන්ති
යස්සුස්සදා නත්ථි කුහිඤ්චි ලොකෙ

788. පකප්පිතා සඞ්ඛතා යස්ස ධම්මා
පුරක්ඛතා සන්ති අවීවදාතා,
යදත්තනී පස්සති ආනිසංසං
තං නිස්සිතො කුප්පපටිච්චසන්තිං.

789. දිට්ඨිනිවෙසා න හි ස්වාතිවත්තා
ධම්මෙසු නිච්ඡෙය්ය සමුග්ගහීතං,
තස්මා නරො තෙසු නිවෙසනෙසු
නිරස්සතී ආදිසතිච්ච ධම්මං.

790. ධොනස්ස හි නත්ථි කුහිඤ්චි ලොකෙ
පකප්පිතා දිට්ඨි භවාභවෙසු,
මායඤ්ච මානඤ්ච පහාය ධොනො
සකෙන ගච්ඡෙය්ය අනූපයො සො.

791. උපයො හි ධම්මෙසු උපෙති වාදං
අනූපයං කෙන කථං වදෙය්ය,
අත්තං නිරත්තං න හි තස්ස අත්ථි
අධොසි සො දිට්ඨිමිධෙව සබ්බන්ති.

792. පස්සාමි සුද්ධං පරමං අරොගං
දිට්ඨෙන සංසුද්ධි නරස්ස හොති,
එතාභිජානං පරමන්ති ඤත්වා
සුද්ධානුපස්සීති පච්චෙති ඤාණං