852. කථංදස්සී කථංසීලො උපසන්තොති වුච්චති,
තං මෙ ගොතම පබ්රූහි පුච්ඡිතො උත්තමං නරං.

853. වීතතණ්හො පුරා භෙදා (ඉති භගවා) පුබ්බමන්තමනිස්සිතො,
වෙමජ්ඣෙනුපසඞ්ඛෙය්යො තස්ස නත්ථි පුරෙක්ඛතං.

854. අක්කොධනො අසන්තාසී අවිකත්ථි අකුක්කුචො,
මන්තභාණී අනුද්ධතො ස වෙ වාචායතො මුනි.

855. නිරාසත්ති අනාගතෙ අතීතං නානුසොචති,
විවෙකදස්සී ඵස්සෙසු දිට්ඨීසු ච න නීයති.

856. පතිලීනො අකුහකො අපිහාලු අමච්ඡරී,
අප්පගබ්භො අජෙගුච්ඡො පෙසුනෙය්යෙ ච නො යුතො.

857. සාතියෙසු අනස්සාවී අතිමානෙ ච නො යුතො,
සණ්හො ච පටිභානවා න සද්ධො න විරජ්ජති.

858. ලාභකම්යා න සික්ඛති අලාභෙ න ච කුප්පති,
අවිරුද්ධො ච තණ්හාය රසෙසු නානුගිජ්ඣති.

859. උපෙක්ඛකො සදා සතො න ලොකෙ මඤ්ඤතෙ සමං,
න විසෙසී න නීචෙය්යො තස්ස නො සන්ති උස්සදා.

860. යස්ස නිස්සයතා නත්ථි ඤත්වා ධම්මං අනිස්සිතො,
භවාය විභවාය වා තණ්හා යස්ස න විජ්ජති.

861. තං බ්රූමි උපසන්තොති කාමෙසු අනපෙක්ඛිනං,
ගන්ථා තස්ස න විජ්ජන්ති අතාරි සො විසත්තිකං.

862. න තස්ස පුත්තා පසවො ඛෙත්තං වත්ථුං ච විජ්ජති
අත්තා වාපි නිරත්තා වා න තස්මිං උපලබ්භති.