682. ආනන්දජාතෙ තිදසගණෙ පතීතෙ
සක්කච්ච ඉන්දං සුචිවසනෙ ච දෙවෙ,
දුස්සං ගහෙත්වා අතිරිව ථොමයන්තෙ
අසිතො ඉසි අද්දස දිවාවිහාරෙ.

683. දිස්වාන දෙවෙ මුදිතමනෙ උදග්ගෙ
චිත්තිං කරිත්වා ඉදමවොචාසි තත්ථ,
කිං දෙවසඞ්ඝො අතිරිව කල්යරූපො
දුස්සං ගහෙත්වා භමයථ කිං පටිච්ච.

684. යදාපි ආසි අසුරෙහි සඞ්ගමො
ජයො සුරානං අසුරා පරාජිතා,
තදාපි නෙතාදිසො ලොමහංසනො
කිං අබ්භුතං දට්ඨු මරූ පමොදිතා.

685. සෙලෙන්ති ගායන්ති ච වාදයන්ති ච
භුජානි පොඨෙන්ති ච නච්චයන්ති ච,
පුච්ඡාමි වොහං මෙරුමුද්ධවාසිනෙ
ධුනාථ මෙ සංසයං ඛිප්පමාරිසා.

686. සො බොධිසත්තො රතනවරො අතුල්යො
මනුස්සෙලොකෙ හිතසුඛතාය ජාතො,
සක්යාන ගාමෙ ජනපදෙ ලුම්බිනෙය්යෙ
තෙනම්හ තුට්ඨා අතිරිව කල්යරූපා.

687. සො සබ්බසත්තුත්තමො අග්ගපුග්ගලො
නරාසභො සබ්බපජානමුත්තමො,
වත්තෙස්සති චක්කං ඉසිවහයෙ වනෙ
නදං ව සීහො බලවා මිගාභිභූ.

688. තං සද්දං සුත්වා තුරිතමවංසරී සො
සුද්ධොදනස්ස තදා භවනං උපාගමි,
නිසජ්ජ තත්ථ ඉදමවොචාසි සක්යෙ
කුහිං කුමාරො අහම්පි දට්ඨුකාමො.

689. තතො කුමාරං ජලිතමිව සුවණ්ණං
උක්කාමුඛෙ’ව සුකුසලසම්පහට්ඨං,
දද්දල්ලමානං සිරියා අනොමවණ්ණං
දස්සෙසු පුත්තං අසිතවහයස්ස සක්යා.

690. දිස්වා කුමාරං සිඛිමිව පජ්ජලන්තං
තාරාසභං ව නභසිගමං විසුද්ධං,
සුරියං තපන්තං සරදරිවබ්භමුත්තං
ආනන්දජාතො විපුලමලත්ථ පීතිං.

691. අනෙකසාඛඤ්ච සහස්සමණ්ඩලං
ඡත්තං මරූ ධාරයුමන්තලික්ඛෙ,
සුවණ්ණදණ්ඩා විතිපතන්ති චාමරා
න දිස්සරෙ චාමරඡතතගාහකා.

692. දිස්වා ජටී කණ්හසිරිව්හයො ඉසි
සුවණ්ණනෙක්ඛං විය පණ්ඩුකම්බලෙ,
සෙතඤ්ච ඡත්තං ධරියන්තමුද්ධනි
උදග්ගචිත්තො සුමනො පටිග්ගහෙ.