2. 7.
බ්රාහ්මණධම්මික සුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො සම්බහුලා කොසලකා බ්රාහ්මණමහාසාළා ජිණ්ණා වුද්ධා මහල්ලකා අද්ධගතා වයො අනුප්පත්තා යෙන භගවා තෙනුපසඞ්කමිංසු, උපසඞ්කමිත්වා භගවතා සද්ධිං සම්මොදිංසු, සම්මොදනීයං කථං සාරාණීයං වීතිසාරෙත්වා එකමන්තං නිසීදිංසු, එකමන්තං නිසින්නා ඛො තෙ බ්රාහ්මණමහාසාළා භගවන්තං එතදවොචුං:
සන්දිස්සන්ති නු ඛො භො ගොතම එතරහි බ්රාහ්මණා පොරාණානං බ්රාහ්මණානං බ්රාහ්මණධම්මෙති.
න ඛො බ්රාහ්මණා සන්දිස්සන්ති එතරහි බ්රාහ්මණා පොරාණානං බ්රාහ්මණානං බ්රාහ්මණධම්මෙති.
සාධු නො භවං ගොතමො පොරාණානං බ්රාහ්මණානං බ්රාහ්මණධම්මං භාසතු සවෙ හොතො ගොතමස්ස අගරූති.
තෙන හි බ්රාහ්මණා සුණාථ සාධුකං මනසි කරොථ භාසිස්සාමීති.
එවං භො’ති ඛො තෙ බ්රාහ්මණමහාසාළා භගවතො පච්චස්සොසුං
භගවා එතදවොච:
286. ඉසයො පුබ්බකා ආසුං සංයතත්තා තපස්සිනො
පඤ්චකාමගුණෙ හිත්වා අත්තදත්ථමචාරිසුං.
287. න පසූ බ්රාහ්මණානාසුං න හිරඤ්ඤං න ධානීයං
සජ්ඣායධනධඤ්ඤාසුං බ්රහ්මං නිධිමපාලයුං.
288. යං තෙසං පකතං ආසි ද්වාරභත්තං උපට්ඨිතං
සද්ධපකතමෙසානං දාතවෙ තදමඤ්ඤිසුං.
289. නානාරත්තෙහි වත්ථෙහි සයනෙභාවසථෙහි ච
ඵිතා ජනපදා රට්ඨා තෙ නමස්සිංසු බ්රාහ්මණෙ.
290. අවජ්ඣා බ්රාහ්මණා ආසුං අජෙය්යා ධම්මරක්ඛිතා
න තෙ කොචි නිවාරෙසි කුලද්වාරෙසු සබ්බසො.
291. අට්ඨචත්තාරිසං වස්සානි කොමාරං බ්රහ්මචරියං චරිංසු තෙ
විජ්ජාචරණපරියෙට්ඨිං අචරුං බ්රාහ්මණා පුරෙ.
292. න බ්රාහ්මණ අඤ්ඤමගමුං නපි භරියං කිණිංසු තෙ
සම්පියෙනෙව සංවාසං සංගන්ත්වා සමරොචයුං.