2. 12.
නිග්රොධකප්ප සුත්තං
එවං මෙ සුතං: එකං සමයං භගවා ආළවියං විහරති අග්ගාළවෙ චෙතියෙ. තෙන ඛො පන සමයෙන ආයස්මතො වඞ්ගීසස්ස උපජ්ඣායො නිග්රොධකප්පො නාම ථෙරො අග්ගාළවෙ චෙතියෙ අචිරපරිනිබ්බුතො හොති.
අථ ඛො ආයස්මතො වංගීසස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි: පරිනිබ්බුතො නු ඛො මෙ උපජ්ඣායො උදාහු නො පරිනිබ්බුතොති.
අථ ඛො ආයස්මා වංගීසො සායන්හසමයං පටිසල්ලානා වුට්ඨිතො යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා වංගීසො භගවන්තං එතදවොච: ඉධ මය්හං භන්තෙ රහොගතස්ස පටිසල්ලීනස්ස එවං චෙතසො පරිවිතක්කො උදපාදී: පරිනිබ්බුතො නු ඛො මෙ උපජ්ඣායො උදාහු නො පරිනිබ්බුතොති.
අථ ඛො ආයස්මා වඞ්ගීසො උට්ඨායාසනා එකංසං චීවරං කත්වා යෙන භගවා තෙනඤ්ජලිං පණාමෙත්වා භගවන්තං ගාථාය අජ්ඣභාසි:
345. පුච්ඡාම සත්ථාරං අනොමපඤ්ඤං
දිට්ඨෙව ධම්මෙ යො විචිකිච්ඡානං ඡෙත්තා,
අග්ගාළවෙ කාලමකාසි භික්ඛු
ඤාතො යසස්සි අභිනිබ්බුතත්තො.
346. නිග්රොධකප්පො ඉති තස්ස නාම,
තයා කතං භගවා බ්රාහ්මණස්ස,
සො තං නමස්සං අචරි මුත්යපෙක්ඛො
ආරද්ධවිරියො දළ්හධම්මදස්සී.
347. තං සාවකං සක්ක මයම්පි සබ්බෙ
අඤ්ඤාතුමිච්ඡාම සමන්තචක්ඛු,
සමවට්ඨිතා නො සවණාය සොතා
ත්වං නො සත්ථා ත්වං අනුත්තරොසි.
348. ඡින්දෙව නො විචිකිච්ඡං බ්රූහි මෙතං
පරිනිබ්බුතං වෙදය භූරිපඤ්ඤ,
මජ්ඣෙව නො භාස සමන්තචක්ඛු
සක්කොව දෙවානං සහස්සනෙත්තො.
349. යෙ කෙචි ගන්ථා ඉධ මොහමග්ගා,
අඤ්ඤාණපක්ඛා විචිකිච්ඡට්ඨානා,
තථාගතං පත්වා න තෙ භවන්ති
චක්ඛුං හි එතං පරමං නරානං.
350. නො චෙ හි ජාතු පුරිසො කිලෙසෙ
වාතො යථා අබ්භඝනං විහානෙ,
තමො වස්ස නිවුතො සබ්බලොකො
න ජොතිමන්තොපි නරා තපෙය්යුං.
351. ධීරා ච පජ්ජොතකරා භවන්ති
තං තං අහං ධීර තථෙව මඤ්ඤෙ,
විපස්සිනං ඣානමුපාගමම්හ
පරිසාසු නො ආවිකරොහි කප්පං.
352. ඛිප්පං ගිරං එරය වග්ගුවග්ගුං
හංසොව පග්ගය්හ සනිකං නිකූජං,
බින්දුස්සරෙන සුවිකප්පිතෙන
සබ්බෙව තෙ උජ්ජුගතා සුණොම.