333. උට්ඨහථ නිසීදථ කො අත්ථො සුපිතෙන වො,
ආතුරානං භි කා නිද්දා සල්ලවිද්ධාන රුප්පතං.

334. උට්ඨහථ නිසීදථ දළ්හං සික්ඛථ සන්තියා,
මා වො පමත්තෙ විඤ්ඤාය
මච්චුරාජා අමොසයිත්ථවසානුහෙ.

335. යාය දෙවා මනුස්ස ච සිතා තිට්ඨන්ති අත්ථිකා,
තරථෙතං’විසත්තිකං ඛණො වො මා උපච්චගා;
ඛණාතීතා හි සොචන්ති නිරයම්හි සමප්පිතා.

336. පමාදො රජො පමාදො පමාදානුපතිතො රජො,
අප්පමත්තෙන විජ්ජාය අබ්බහෙ සල්ලමත්තනොති.

337. කච්චි අභිණ්හසංවාසා නාවජානාසි පණ්ඩිතං
උක්කාධාරො මනුස්සානං කච්චි අපචිතො තයා

338. නාහං අභිණ්හසංවාසා අවජානාමි පණ්ඩිතං,
උක්කාධාරො මනුස්සානං නිච්චං අපචිතො මයා.

339. පඤ්චකාමගුණෙ හිත්වා පියරූපෙ මනොරමෙ,
සද්ධාය ඝරා නික්ඛම්ම දුක්ඛස්සන්තකරො භව.

340. මිත්තෙ භජස්සු කල්යාණෙ පන්තඤ්ච සයනාසනං,
විචිත්තං අප්පනිග්ඝොසං මත්තඤ්ඤූ හොහි භොජනෙ.

341. චීවරෙ පිණ්ඩපාතෙ ච පච්චයෙ සයනාසනෙ,
එතෙසු තණ්හං මා කාසි මා ලොකං පුනරාගමි.

342. සංවුතො පාතිමොක්ඛස්මිං ඉන්ද්රියෙසු ච පඤ්චසු,
සති කායගතාත්යත්ථු නිබ්බිදා බහුලො භව.