1. 6.
පරාභවසුත්තං
එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
91. පරාභවන්තං පුරිසං මයං පුච්ඡාම ගොතමං,
භගවන්තං පුට්ඨුමාගම්ම කිං පරාභවතො මුඛං.
92. සුවිජානො භවං හොති සුවිජානො පරාභවො,
ධම්මකාමො භවං හොති ධම්මදෙස්සී පරාභවො.
93. ඉති හෙතං විජානාම පඨමො සො පරාභවො,
දුතියං භගවා බ්රූහි කිං පරාභවතො මුඛං.
94. අසන්තස්ස පිසා හොන්තී සන්තෙ න කුරුතෙ පියං,
අසතං ධම්මං රොචෙති තං පරාභවතො මුඛං.
95. ඉති හෙතං විජානාම දුතියො සො පරාභවො,
තතියං භගවා බ්රූහි කිං පරාභවතො මුඛං.
96. නිද්දාසීලී සභාසීලී අනුට්ඨාතා ච යො නරො,
අලසො කොධපඤ්ඤාණො තං පරාභවතො මුඛං.
97. ඉති හෙතං විජානාම තතියො සො පරාභවො,
චතුත්ථං භගවා බ්රූහි කිං පරාභවතො මුඛං.
98. යො මාතරං වා පිතරං වා ජිණ්ණකං ගතයොබ්බනං,
පහූ සන්තො න භරති තං පරාභවතො මුඛං.
99. ඉති හෙතං විජානාම චතුත්ථො සො පරාභවො,
පඤ්චමං භගවා බ්රූහි කිං පරාභවතො මුඛං.
100. යො බ්රාහ්මණං වා සමණං වා අඤ්ඤං වාපි වණිබ්බකං,
මුසාවාදෙන වඤ්චෙති තං පරාභවතො මුඛං,