783. ගූථකූපතො උග්ගන්ත්වා කා නු දීනා හි තිට්ඨසි,
නිස්සංසයං පාපකම්මන්තා කින්නු සද්දහසෙ තුවං.

784. අහං භද්දන්ත පෙතීම්හි දුග්ගතා යමලොකිකා,
පාපකම්මං කරිත්වාන පෙතලොකමිතො ගතා.

785. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන ඉදං දුක්ඛං නිගච්ඡසි.

786. අහු ආවාසිකො මය්හං ඉස්සුකී කුලමච්ඡරී,
අජ්ඣාසිතො මය්හං ඝරෙ කදරියො පරිභාසකො.

787. තස්සාහං වචනං සුත්වා භික්ඛවො පරිභාසිසං,
තස්ස කම්මවිපාකෙන පෙතලොකමිතො ගතා.

788. අමිත්තො මිත්තවණ්ණෙන යො තෙ ආසි කුලූපකො,
කායස්ස භෙදා දුප්පඤ්ඤො කින්නු පෙච්ච ගතිං ගතො.

789. තස්සෙවාහං පාපකම්මස්ස සීසෙ තිට්ඨාමි මත්ථකෙ,
සො ච පරවිසයං පත්තො මමෙව පරිචාරකො.

790. යං භද්දන්ත හදන්තඤ්ඤෙ එතං මෙ හොති භොජනං,
අහං ච ඛො යං හදාමි එතං සො උපජීවතී’ති.

791. නග්ගා දුබ්බණ්ණරූපාත්ථ කිසා ධමනිසන්ථතා,
උප්ඵාසුලිකා කිසිකා කෙ නු තුම්භෙත්ථ මාරිසා.

792. මයං භද්දන්ත පෙතාම්හා දුග්ගතා යමලොකිකා,
පාපකම්මං කරිත්වාන පෙතලොකමිතො ගතා.

793. කින්නු කායෙන වාචාය මනාසා දුක්කටං කතං,
කිස්ස කම්මවිපාකෙන පෙතලොකමිතො ගතා.

794. ආනවටෙසු තිත්ථෙසු විචිනිම්භද්ධමාසකං,
සන්තෙසු දෙය්යධම්මෙසු දීපං නාකම්හ අත්තනො.

795. නදිං උපෙම තසිතා රිත්තකා පරිවත්තති,
ඡායං උපෙම උණ්හෙසු ආතපො පරිවත්තති.

796. අග්ගිවණ්ණො ච නො වාතො දහන්තො උපවායති,
එතඤ්ච භන්තෙ අරහාම අඤ්ඤඤ්ච පාපකං තතො.

797. අධි යොජනානි ගච්ඡාම ඡාතා ආහාරගෙධිනො,
අලද්ධාව නිවත්තෙම අහො නො අප්පපුඤ්ඤතා.

798. ඡාතා පමුච්ඡිතා භන්තා භූමියං පටිසුම්භිතා,
උත්තානා පතිකිරාම අවකුජ්ජා පතාමසෙ.

799. තෙ ච තත්ථෙව පතීතා භූමියං පටිසුම්භිතා,
උරං සීසඤ්ච ඝට්ටෙම අහො නො අප්පපුඤ්ඤතා.

800. එතඤ්ච භන්තෙ අරහාම අඤ්ඤං ච පාපකං තතො,
සන්තෙසු දෙය්යධම්මෙසු දීපං නාකම්හ අත්තනො.

801. තෙ හි නූන ඉතො ගන්ත්වා යොනිං ලද්ධාන මානුසිං,
වදඤ්ඤූ සීලසම්පන්නා කාහාම කුසලං බහු’න්ති.

802. දිට්ඨා තයා නිරයා තිරච්ඡානයොනි
පෙතා අසුරා අථවාපි මනුස්සා දෙවා
සයමද්දස කම්මවිපාකමත්තනො
නෙස්සාමි තං පාටලිපුත්තමක්ඛතං
තත්ථ ගන්ත්වා කුසලං කරොහි ධම්මං.

803. අත්ථකාමොසි මෙ යක්ඛ හිතකාමොසි දෙවතෙ,
කරොමි තුය්හං වචනං ත්වංසි ආචරියො මම.

804. දිට්ඨා මයා නිරයා තිරච්ඡානයොනි
පෙතා අසුරා අථවාපි මනුස්සා දෙවා
සයමද්දස කම්මවිපාකමත්තනො
කාහාමි පුඤ්ඤානි අනප්පකානී’ති.