809. යං දදාති න තං හොති දෙථෙව දානං දත්වා උභයං තරති,
උභයං තෙන දානෙන ගච්ඡති ජාගරථ මා පමජ්ජථා’ති.

810. මයං භොගෙ සම්භරිම්හා සමෙන විසමෙන ච,
තෙ අඤ්ඤෙ පරිභුඤ්ජන්ති මයං දුක්ඛස්ස භාගිනී’ති.

811. සට්ඨිවස්සසහස්සානි පරිපුණ්ණානි සබ්බසො,
නිරයෙ පච්චමානානං කදා අන්තො භවිස්සති.

812. නත්ථි අන්තො කුතො අන්තො න අන්තො පතිදිස්සති,
තථා හි පකතං පාපං මම තුය්හං ච මාරිස.

813. දුජ්ජීවිතං අජීවිම්හ යෙ සන්තෙ න දදම්හසෙ,
සන්තෙසු දෙය්යධම්මෙසු දීපං නාකම්හ අත්තනො.

814. සො හි නූන ඉතො ගන්ත්වා යොනිං ලද්ධාන මානුසිං,
වදඤ්ඤූ සීලසම්පන්නො කාහාමි කුසලං බහු’න්ති.

815. කින්නු උම්මත්තරූපො ච මිගො භන්තො ව ධාවසි,
නිස්සංසයං පාපකම්මන්තො කින්නු සද්දායසෙ තුවං.

816. අහං භද්දන්ත පෙතොම්හි දුග්ගතො යමලොකිකො,
පාපකම්මං කරිත්වාන පෙතලොකං ඉතො ගතො.

817. සට්ඨිකූටසහස්සානි පරිපුණ්ණානි සබ්බසො,
සීසෙ මය්හං නිපතන්ති තෙ භින්දන්ති ච මත්ථකං.

818. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන ඉදං දුක්ඛං නිගච්ඡසි.

819. සට්ඨිකූටසහස්සානි පරිපුණ්ණානි සබ්බසො,
සීසෙ තුය්හං නිපතන්ති තෙ භින්දන්ති ච මත්ථකං.

820. අථද්දසාසිං සම්බුද්ධං සුනෙත්තං භාවිතින්ද්රියං,
නිසින්නං රුක්ඛමූලස්මිං ඣායන්තමකුතොභයං.

821. සාලිත්තකප්පහාරෙන භින්දිස්සං තස්ස මත්ථකං,
තස්ස කම්මවිපාකෙන ඉදං දුක්ඛං නිගච්ඡිසං.

822. සට්ඨිකූටසහස්සානි පරිපුණ්ණානි සබ්බසො,
සීසෙ මය්හං නිපතන්ති තෙ භින්දන්ති ච මත්ථකං.

823. ධම්මෙන තෙ කාපුරිසා-
සට්ඨිකූටසහස්සානි පරිපුණ්ණානි සබ්බසො,
සීසෙ තුය්හං නිපතන්ති තෙ භින්දන්ති ච මත්ථක’න්ති.

අම්බසක්ඛරො සෙරිස්සකො පිඞ්ගලො රෙවතී උච්ඡුඛාදකා
ද්වෙ කුමාරා ද්වෙ ගූථඛාදකා ගණපාටලි පොක්ඛරඤ්ච අම්බරුක්ඛ-
භොගසංහාරා සෙට්ඨිපුත්ත සට්ඨිකූටා ඉති සොළසවත්ථූනි
තෙන පවුච්චතී’ති.