526. වෙසාලී නාම නගරත්ථි වජ්ජීනං
තත්ථ අහු ලිච්ඡවි අම්බසක්ඛරො,
දිස්වාන පෙතං නගරස්ස බාහිරං
තත්ථෙව පුච්ඡිත්ථ තං කාරණත්ථිකො.

527. සෙය්යා නිසජ්ජා නයිමස්ස අත්ථි
අභික්කමො නත්ථි පටික්කමො වා,
අසිතපීතඛායිතවත්ථභොගා
පරිචාරිකා සාපි ඉමස්ස නත්ථි

528. යෙ ඤාතකා දිට්ඨසුතා සුහජ්ජා
අනුකම්පකා යස්ස පුබ්බෙ අහෙසුං,
දට්ඨුම්පි තෙ දානි න තං ලභන්ති
විරාධිතත්තො හි ජනෙන තෙන.

529. න ඔග්ගතන්තස්ස භවන්ති මිත්තා
ජහන්ති මිත්තා විකලං විදිත්වා,
අත්ථඤ්ච දිස්වා පරිවාරයන්ති
බහූ ච මිත්තා උග්ගතත්තස්ස හොන්ති.

530. නිහීනත්තො සබ්බභොගෙහි කිච්ඡො
සම්මක්ඛිතො සම්පරිභින්න ගත්තො,
උස්සාවබින්දූව පලිප්පමානො
අජ්ජ සුවෙ ජීවිතස්සූපරොධො.

531. එතාදිසං උත්තමකිච්ඡපත්තං
උත්තාසිතං පුචිමන්දස්ස සූලෙ,
අත්ථ ත්වං කෙන වණ්ණෙන වදෙසි යක්ඛ
ජීව භො ජීවිතමෙව සෙය්යොති.

532. සාලොහිතො එස අහොසි මය්හං
අහං සරාමි පුරිමාය ජාතියා,
දිස්වා ච මෙ කාරුඤ්ඤමහොසි රාජ
මා පාපධම්මො නිරයං පතායං.

533. ඉතො චුතො ලිච්ඡවි එස පොසො
සත්තුස්සදං නිරයං ඝොරරූපං,
උපපජ්ජති දුක්කතකම්මකාරී
මහාභිතාපං කටුකං භයානකං

534. අනෙකභාගෙන ගුණෙන සෙය්යො
අයමෙව සූලො නිරයෙන තෙන,
එකන්තදුක්ඛං කටුකං භයානකං
එකන්තතිප්පං නිරයං පතායං.

535. ඉදඤ්ච සුත්වා වචනං මමෙසො
දුක්ඛූපනීතො විජහෙය්ය පාණං,
තස්මා අහං සන්තිකෙ න භණාමි
මා මෙ කතො ජීවිතස්සූපරොධො.

536. අඤ්ඤතො එසො පුරිසස්ස අත්ථො
අඤ්ඤම්පි ඉච්ඡාමසෙ පුච්ඡිතුං තුවං,
ඔකාසකම්මං සචෙ නො කරොසි
පුච්ඡාමි තං න ච නො කුජ්ඣිතබ්බං.

537. අද්ධා පටිඤ්ඤා මෙ තදා අහු
නාචික්ඛනා අප්පසන්නස්ස හොති,
අකාමා සද්ධෙය්යවචොති කත්වා
පුච්ඡස්සු මං කාමං යථා විසය්හං

538. යං කිඤ්චාහං චක්ඛුනා පස්සිස්සාමි
සබ්බම්පි තාහං අභිසද්දහෙය්යං,
දිස්වාන තං නොපි චෙ සද්දහෙය්යං
කරෙය්යාසි මෙ යක්ඛ නියස්සකම්මං.

539. සච්චප්පටිඤ්ඤා තව මෙසා හොතු
සුත්වාන ධම්මං ලභස්සුප්පසාදං,
අඤ්ඤත්ථිකො නො ච පදුට්ඨචිත්තො
යං තෙ සුතං අසුතං චාපි ධම්මං
සබ්බං ආචික්ඛිස්සං යථා පජානං

540. සෙතෙන අස්සෙන අලඞ්කතෙන
උපයාසි සූලාවුතකස්ස සන්තිකෙ,
යානං ඉදං අබ්භුතං දස්සනෙය්යං
කිස්සෙතං කම්මස්ස අයං විපාකො.

541. වෙසාලියා තස්ස නගරස්ස මජ්ඣෙ
චික්ඛල්ලමග්ගෙ නරකං අහොසි,
ගොසීසමෙකාහං පසන්නචිත්තො
සෙතං ගහෙත්වා නරකස්මිං නික්ඛිපිං.