497. කූටාගාරෙ ච පාසාදෙ පල්ලඞ්කෙ ගොණකත්ථකෙ,
පඤ්චඞ්ගිකෙන තුරියෙන රමසි සුප්පවාදිතෙ,

498. තතො රත්යා ව්යවසානෙ සුරියස්සුග්ගමනම්පති,
අපවිද්ධො සුසානස්මිං බහුදුක්ඛං නිගච්ඡසි.

499. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන ඉදං දුක්ඛං නිගච්ඡසි.

500. අහං රාජගහෙ රම්මෙ රමණීයෙ ගිරිබ්බජෙ,
මිගලුද්දො පුරෙ ආසිං ලුද්දො චාසිමසඤ්ඤතො.

501. තස්ස මෙ සහායො සුහදො සද්ධො ආසි උපාසකො,
තස්ස කුලූපගො භික්ඛු ආසි ගොතමසාවකො.

502. සොපි මං අනුකම්පන්නො නිවාරෙසි පුනප්පුනං,
මාකාසි පාපකං කම්මං මා තාත දුග්ගතිං අගා.

503. සචෙ ඉච්ඡසි පෙච්ච සුඛං විරම පාණවධා අසංයමා.
තස්සාහං වචනං සුත්වා සුඛකාමස්ස හිතානුකම්පිනො.

504. නාකාසිං සකලානුසාසනිං චිරපාපාභිරතො අබුද්ධිමා,
සො මං පුන භූරිසුමෙධසො අනුකම්පාය සංයමෙ නිවෙසයී.

505. සචෙ දිවා හනසි පාණිනො අථ තෙ රත්තිං භවතු සංයමො.
ස්වාහං දිවා හනිත්ව පාණිනො විරතො රත්තිමහොසිං සංයතො.

506. රත්තාහං පරිචාරෙමි දිවා ඛජ්ජාමි දුග්ගතො,
තස්ස කම්මස්ස කුසලස්ස අනුභොමි රත්තිං අමානුසිං:
දිවා පටිහතාව කුක්කුරා උපධාවන්ති සමන්තා ඛාදිතුං.

507. යෙ ච තෙ සතතානුයොගිනො ධුවයුත්තා සුගතස්ස සාසනෙ,
මඤ්ඤාමි තෙ අමතමෙව කෙවලං අධිගච්ඡන්ති පදං අසඞ්ඛත’න්ති.

508. මාලී කිරිටී කෙයූරි ගත්තා තෙ චන්දනුස්සදා,
පසන්නමුඛවණ්ණොසි සුරියවණ්ණොව සොභසි.

509. අමානුසා පාරිසජ්ජා යෙ තෙමෙ පරිචාරකා,
දසකඤ්ඤාසහස්සානි යා තෙමා පරිචාරකා.

510. තා කම්බුකෙයූර ධරා කඤ්චනාවෙලභූසිතා,
මහානුභාවොසි තුවං ලොමහංසනරූපවා:
පිට්ඨිමංසානි අත්තනො සාමං උක්කඩ්ඪ ඛාදසි.

511. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන පිට්ඨිමංසානි අත්තනො සාමං උක්කඩ්ඪ ඛාදසි.

512. අත්තනොහං අනත්ථාය ජීවලොකෙ අචාරිසං,
පෙසුඤ්ඤාමුසාවාදෙන නිකතිවඤ්චනාය ච.

513. තත්ථාහං පරිසං ගන්ත්වා සච්චකාලෙ උපට්ඨිතෙ,
අත්ථං ධම්මං නිරංකත්වා අධම්මමනුවත්තිසං.