134. නග්ගා දුබ්බණ්ණරූපාසි කිසා ධමනි සන්ථතා,
උප්ඵාසුලිකෙ කිසිකෙ කා නු ත්වං ඉධ තිට්ඨසි?.

135. අහං මත්තා තුවං තිස්සා සපත්ති තෙ පුරෙ අහුං,
පාපකම්මං කරිත්වාන පෙතලොකමිතො ගතාති.

136. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන පෙතලොකමිතො ගතා?.

137. චණ්ඩී ච ඵරුසා චාසිං ඉස්සුකී මච්ඡරී සඨා,
තාහං දුරුත්තං වත්වාන පෙතලොකමිතො ගතා.

138. සබ්බං අහම්පි ජානාමි යථා ත්වං චණ්ඩිකා අහු,
අඤ්ඤඤ්ච ඛො තං පුච්ඡාමි කෙනාසි පංසුකුණ්ඨිතා.

139. සීසං නහාතා ත්වං ආසි සුචිවත්ථා අලඞ්කතා,
අහඤ්ච ඛො තං අධිමත්තං සමලඞ්කතතරා තයා.

140. තස්සා මෙ පෙක්ඛමානාය සාමිකෙන සමන්තයි,
තතො මෙ ඉස්සා විපුලා කොධො මෙ සමජායථ.

141. තතො පංසුං ගහෙත්වාන පංසුනා තං හි ඔකිරිං,
තස්ස කම්මවිපාකෙන තෙනම්හි පංසුකුණ්ඨිතා.

142. සබ්බං අහම්පි ජානාමි පංසුනා මං ත්වමොකිරි,
අඤ්ඤඤ්ච ඛො තං පුච්ඡාමි කෙන ඛජ්ජසි කච්ඡුයා.

143. භෙසජ්ජහාරි උභයො වනන්තං අගමිම්හසෙ,
ත්වඤ්ච භෙසජ්ජමාහරි අහඤ්ච කපිකච්ඡුනො.

144. තස්සා ත්යාජානමානාය සෙය්යං ත්යාහං සමොකිරිං,
තස්ස කම්මවිපාකෙන තෙන ඛජ්ජාමි කච්ඡුයා.

145. සබ්බං අහම්පි ජානාමි සෙය්යං මෙ ත්වං සමොකිරි,
අඤ්ඤඤ්ච ඛො තං පුච්ඡාමි කෙනාසි නග්ගියා තුවං.

146. සහායානං සමයො ආසි ඤාතිනං සමිතී අහු,
ත්වඤ්ච ආමන්තිතා ආසි සසාමිනී නො ච ඛො අහං.

147. තස්සා ත්යාජානමානාය දුස්සන්ත්යාහං අපානුදිං,
තස්ස කම්මවිපාකෙන තෙනම්හි නග්ගියා අහං.