372. අහු රාජා බ්රහ්මදත්තො පඤ්චාලානං රථෙසභො,
අහොරත්තානමච්චයා රාජා කාලඞ්කරී තදා.

373. තස්ස ආළාහනං ගන්ත්වා භරියා කන්දති උබ්බරී,
බ්රහ්මදත්තං අපස්සන්තී බ්රහ්මදත්තාති කන්දති.

374. ඉසීච තත්ථ ආගඤ්ඡි සම්පන්නචරණො මුනි:
සො ච තත්ථ අපුච්ඡිත්ථ යෙ තත්ථ සුසමාගතා.

375. කස්ස චිදං ආළාහනං නානාගන්ධසමෙරිතං,
කස්සායං කන්දති භරියා ඉතො දූරගතං පතිං.

376. බ්රහ්මදත්තං අපස්සන්තී බ්රහ්මදත්තාති කන්දති,
තෙ ච තත්ථ වියාකංසු යෙ තත්ථ සුසමාගතා.

377. බ්රහ්මදත්තස්ස භද්දන්තෙ බ්රහ්මදත්තස්ස මාරිස,
තස්ස ඉදං ආළාහනං නානාගන්ධසමෙරිතං.

378. තස්සායං කන්දති භරියා ඉතො දූරගතං පතිං,
බ්රහ්මදත්තං අපස්සන්තී බ්රහ්මදත්තාති කන්දති.

379. ඡළාසීති සහස්සානි බ්රහ්මදත්තසනාමකා,
ඉමස්මිං ආළාහනෙ දඩ්ඪා තෙසං කං අනුසොචසි.

380. යො රාජා චූළනීපුත්තො පඤ්චාලානං රථෙසභො,
තං භන්තෙ අනුසොචාමි භත්තාරං සබ්බකාමදං.

381. සබ්බෙවහෙසුං රාජානො බ්රහ්මදත්තසනාමකා,
සබ්බෙව චූළනීපුත්තා පඤ්චාලානං රථෙසභා.

382. සබ්බෙසං අනුපුබ්බෙන මහෙසිත්තමකාරයි,
කස්මා පුරිමකෙ හිත්වා පච්ඡිමං අනුසොචසි.

383. ආතුමෙ ඉත්ථිභූතාය දීඝරත්තාය මාරිස,
යස්සා මෙ ඉත්ථිභූතාය සංසාරෙ බහූ භාසසි.

384. අහූ ඉත්ථි අහූ පුරිසො පසුයොනිම්පි ආගමා,
එවමෙතං අතීතානං පරියන්තො න දිස්සති.

385. ආදිත්තං වත මං සන්තං ඝතසිත්තංව පාවකං,
වාරිනා විය ඔසිඤ්චං සබ්බං නිබ්බාපයෙ දරං.

386. අබ්බූළ්හං වත මෙ සල්ලං සොකං හදයනිස්සිතං,
යො මෙ සොකපරෙතාය පතිසොකං අපානුදි.

387. සාහං අබ්බූළ්හසල්ලොස්මි සීතිභූතොස්මි නිබ්බුතා,
න සොචාමි න රොදාමි තව සුත්වා මහාමුනි.

388. තස්ස තං වචනං සුත්වා සමණස්ස සුභාසිතං,
පත්තචීවරමාදාය පබ්බජි අනගාරියං.

389. සා ච පබ්බජිතා සන්තා අගාරස්මානගාරියං,
මෙත්තං චිත්තං අභාවෙසි බ්රහ්මලොකූපපත්තියා.

390. ගාමා ගාමං විචරන්ති නිගමෙ රාජධානියො,
උරුවෙලා නාම සො ගාමො යත්ථ කාලමකුබ්බථ.

391. මෙත්තචිත්තං ආභාවෙත්වා බ්රහ්මලොකූපපත්තියා,
ඉත්ථිචිත්තං විරාජෙත්වා බ්රහ්මලොකූපගා අහූ’ති.

පණ්ඩුමාතා ච පිතා ච නන්දා කුණ්ඩලීනෙඝටො.
ද්වෙ සෙට්ඨි තුණ්ණවායො ච:
විහාරසුත්ත සොපාණ උබ්බරී’ති.