95. නග්ගා දුබ්බණ්ණරූපාසි කිසා ධමනිසන්ථතා,
උප්ඵාසුලිකෙ කිසිකෙ කා නු ත්වං ඉධ තිට්ඨසී’?ති.

96. අහං භදන්තෙ පෙතීම්හි දුග්ගතා යමලොකිකා,
පාපකම්මං කරිත්වාන පෙතලොකමිතො ගතා’ති.

97. කින්නු කායෙන වාචාය මනසා දුක්කටං කතං,
කිස්ස කම්මවිපාකෙන පෙතලොකමිතො ගතා?’ති.

98. අනුකම්පකා මය්හං නාහෙසුං භන්තෙ
පිතා ච මාතා අථවාපි ඤාතකා,
යෙ මං නියොජෙය්යුං දදාහි දානං
පසන්නචිත්තා සමණබ්රාහ්මණානං.

99. ඉතො අහං වස්ස සතානි පඤ්ච
යං එවරූපා විචරාමි නග්ගා,
ඛුදාය තණ්හාය ච ඛජ්ජමානා
පාපස්ස කම්මස්ස ඵලං මමෙදං.

100. වන්දාමි තං අය්ය පසන්නචිත්තා
අනුකම්ප මං ධීර මහානුභාව,
දත්වා ච මෙ ආදිස්ස යං හි කිඤ්චි
මොචෙහි මං දුග්ගතියා භදන්තෙති.

101. සාධූති සො පටිස්සුත්වා සාරිපුත්තොනුකම්පකො,
භික්ඛූනං ආලොපං දත්වා පාණිමත්තඤ්ච චෙලකං:
ථාලකස්ස ච පානීයං තස්සා දක්ඛිණමාදිසි.

102. සමනන්තරානුද්දිට්ඨෙ විපාකො උදපජ්ජථ,
භොජනච්ඡාදනපානීයං දක්ඛිණාය ඉදං ඵලං.

103. තතො සුද්ධා සුචිවසනා කාසිකුත්තමධාරිණී,
විචිත්තවත්ථාභරණා සාරිපුත්තමුපසඞ්කමී’ති.

104. අභික්කන්තෙන වණ්ණෙන යා ත්වං තිට්ඨසි දෙවතෙ,
ඔභාසෙන්තී දිසා සබ්බා ඔසධී විය තාරකා.

105. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසො පියා?.

106. පුච්ඡාමි තං දෙවි මහානුභාවෙ
මනුස්සභූතා කිමකාසි පුඤ්ඤං,
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතී’?ති

107. උප්පණ්ඩුකිං කිසං ඡාතං නග්ගං ආපතිතච්ඡවිං
මුනි කාරුණිකො ලොකෙ තං මමද්දක්ඛි දුක්ඛිතං.

108. භික්ඛූනං ආලොපං දත්වා පාණිමත්තඤ්ච චොළකං,
ථාලකස්සච පානීයං මම දක්ඛිණමාදිසි.

109. ආලොපස්ස ඵලං පස්ස භත්තං වස්සසතං දස,
භුඤ්ජාමි කාමකාමිනී අනෙකරසබ්යඤ්ජනං

110. පාණිමත්තස්ස චොලස්ස විපාකං පස්ස යාදිසං,
යාවතා නන්දරාජස්ස විජිතස්මිං පටීච්ඡදා.

111. තතො බහුතරා භන්තෙ වත්ථානච්ඡාදනානි මෙ,
කොසෙය්යකම්බලීයානි ඛොමකප්පාසිකානි ච,

112. විපුලා ච මහග්ඝා ච තෙපාකාසෙව ලම්බරෙ,
සාහං තං පරිදහාමි යං යං හි මනසො පියං,

113. ථාලකස්ස ච පානීයං විපාකං පස්ස යාදිසං,
ගම්භීරා චතුරස්සා ච පොක්ඛරඤ්ඤො සුනිම්මිතා.

114. සාතොදකා සුප්පතිත්ථා සීතා අප්පටිගන්ධියා,
පදුමුප්පලසඤ්ඡන්නා වාරිකිඤ්ජක්ඛපූරිතා.

115. සාහං රමාමි කීළාමි මොදාමි අකුතොභයා,
මුනිං කාරුණිකං ලොකෙ භන්තෙ වන්දිතුමාගතා’ති.