1. ඛෙත්තූපමා අරහන්තො දායකා කස්සකූපමා,
බීජූපමං දෙය්යධම්මං එත්තො නිබ්බත්තතෙ ඵලං

2. එතං බීජං කසී ඛෙත්තං පෙතානං දායකස්ස ච,
තං පෙතා පරිභුඤ්ජන්ති දාතා පුඤ්ඤෙන වඩ්ඪති.

3. ඉධෙව කුසලං කත්වා පෙතෙ ච පටිපූජිය
සග්ගඤ්ච කමතිට්ඨානං කම්මං කත්වාන භද්දක’න්ති.

4. කායො තෙ සබ්බසොවණ්ණො සබ්බා ඔභාසතෙ දිසා,
මුඛං තෙ සූකරස්සෙව කිං කම්මමකරි පූරෙති.

5. කායෙන සඤ්ඤතො ආසිං වාචායාසිමසඤ්ඤතො,
තෙන මෙ තාදිසො වණ්ණො යථා පස්සසි නාරද.

6. තං ත්යාහං නාරද බ්රූමි සාමං දිට්ඨමිදං තයා,
මාකාසි මුඛසා පාපං මා ඛො සූකරමුඛො අහූ’ති.

7. දිබ්බං සුභං ධාරෙසි වණ්ණධාතුං
වෙහාසයං තිට්ඨසි අන්තලික්ඛෙ,
මුඛඤ්ච තෙ කිමයො පූතිගන්ධං
ඛාදන්ති කිං කම්මමකාසි පුබ්බෙති?.

8. සමණො අහං පාපො දුට්ඨවාචො
තපස්සිරූපො මුඛසා අසඤ්ඤතො,
ලද්ධා ච මෙ තපසා වණ්ණධාතු
මුඛඤ්ච මෙ පෙසුනියෙන පූති.

9. තයිදං තයා නාරද සාමං දිට්ඨං
අනුකම්පකා යෙ කුසලා වදෙය්යුං,
මා පෙසුනං මා ච මුසා අභාණී
යක්ඛො තුවං හොහිසි කාමකාමී’ති.

10. යං කිඤ්චාරම්මණං කත්වා දජ්ජා දානං අමච්ඡරී,
පුබ්බපෙතෙ ච ආරබ්භ අථවා වත්ථු දෙවතා.

11. චත්තාරො ච මහාරාජෙ ලොකපාලෙ යසස්සිනො,
කුවෙරං ධතරට්ඨං ච විරූපක්ඛං විරූළ්හකං,
තෙ චෙව පූජිතා හොන්ති දායකා ච අනිප්ඵලා.

12. න හි රුණ්ණං ච සොකො වා යා චඤ්ඤා පරිදෙවනා,
න තං පෙතස්ස අත්ථාය එවං තිට්ඨන්ති ඤාතයො.

13. අයඤ්ච ඛො දක්ඛිණා දින්නා සඞ්ඝම්හි සුප්පතිට්ඨිතා,
දීඝරත්තං හිතායස්ස ඨානසො උපකප්පතී’ති.