එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි ‘භික්ඛවො’ති. ‘භදන්තෙ’ති තෙ භික්ඛූ භගවතො පච්චස්සොසුං. භගවා එතදවොච:

පඤ්චිමානි භික්ඛවෙ, ඉන්ද්රියානි, කතමානි පඤ්ච: සද්ධින්ද්රියං විරියින්ද්රියං සතින්ද්රියං සමාධින්ද්රියං පඤ්ඤින්ද්රියං. ඉමානි ඛො භික්ඛවෙ. පඤ්චින්ද්රියානි.

ඉමානි පඤ්චින්ද්රියානි කතිහාකාරෙහි විසුජ්ඣන්ති: ඉමානි පඤ්චින්ද්රියානි පන්නරසහි ආකාරෙහි විසුජ්ඣන්ති. අස්සද්ධෙ පුග්ගලෙ පරිවජ්ජයතො, සද්ධෙ පුග්ගලෙ සෙවතො භජතො පයිරුපාසතො, පසාදනීයෙ සුත්තන්තෙ පච්චවෙක්ඛතො, ඉමෙහි තීහාකාරෙහි සද්ධින්ද්රියං විසුජ්ඣති.

කුසීතෙ පුග්ගලෙ පරිවජ්ජයතො, ආරද්ධවිරියෙ පුග්ගලෙ සෙවතො භජතො පයිරුපාසතො, සම්මප්පධානෙ පච්චවෙක්ඛතො, ඉමෙහි තීහාකාරෙහි විරියින්ද්රියං විසුජ්ඣති.

මුට්ඨස්සතී පුග්ගලෙ පරිවජ්ජයතො, උපට්ඨිතසති, පුග්ගලෙ සෙවතො භජතො පයිරුපාසතො, සතිපට්ඨානෙ පච්චවෙක්ඛතො, ඉමෙහි තීහාකාරෙහි සතින්ද්රියං විසුජ්ඣති.

අසමාහිතෙ පුග්ගලෙ පරිවජ්ජයතො, සමාහිතෙ පුග්ගලෙ සෙවතො භජතො පයිරුපාසතො, ඣානවිමොක්ඛෙ පච්චවෙක්ඛතො, ඉමෙහි තීහාකාරෙහි සමාධින්ද්රියං විසුජ්ඣති.

දුප්පඤ්ඤෙ පුග්ගලෙ පරිවජ්ජයතො, පඤ්ඤවන්තෙ පුග්ගලෙ සෙවතො භජතො පයිරුපාසතො, ගම්භිරඤාණචරියං පච්චවෙක්ඛතො, ඉමෙහි තීහාකාරෙහි පඤ්ඤින්ද්රියං විසුජ්ඣති.

ඉති ඉමෙ පඤ්ච පුග්ගලෙ පරිවජ්ජයතො, පඤ්ච පුග්ගලෙ සෙවතො භාජතො පයිරු පාසතො, පසාදනීයෙ සුත්තන්තෙ පච්චවෙක්ඛතො, ඉමෙහි පන්නරසහි ආකාරෙහි ඉමානි පඤ්චින්ද්රියානි විසුජ්ඣන්ති.

කතිහාකාරෙහි පඤ්චින්ද්රියානි භාවීයන්ති, කතිහාකාරෙහි පඤ්චන්නං ඉන්ද්රියානං භාවනා හොති: දසහාකාරෙහි පඤ්චින්ද්රියානි භාවීයන්ති, දසහාකාරෙහි පඤ්චන්නං ඉන්ද්රියානං භාවනා හොති.

අස්සද්ධියං පජහන්තො සද්ධින්ද්රියං භාවෙති. සද්ධින්ද්රියං භාවෙන්තො අස්සද්ධියං පජහති. කොසජ්ජං පජහන්තො විරියින්ද්රියං භාවෙති, විරියින්ද්රියං භාවෙන්තො කොසජ්ජං පජහති. පමාදං පජහන්තො සතින්ද්රියං භාවෙති, සතින්ද්රියං භාවෙන්තො පමාදං පජහති. උද්ධච්චං පජහන්තො සමාධින්ද්රියං භාවෙති, සමාධින්ද්රියං භාවෙන්තො උද්ධච්චං පජහති. අවිජ්ජං පජහන්තො පඤ්ඤින්ද්රියං භාවෙති, පඤ්ඤින්ද්රියං භාවෙන්තො අවිජ්ජං පජහති.

ඉමෙහි දසහාකාරෙහි පඤ්චින්ද්රියානි භාවියන්ති, ඉමෙහි දසහාකාරෙහි පඤ්චන්නං ඉන්ද්රියානං භාවනා හොති.

කතිහාකාරෙහි පඤ්චින්ද්රියානි භාවිතානි හොන්ති සුභාවිතානි: දසහාකාරෙහි පඤ්චින්ද්රියානි භාවිතානි හොන්ති සුභාවිතානි.

අස්සද්ධියස්ස පහීනත්තා සුප්පහීනත්තා සද්ධින්ද්රියං භාවිතං හොති සුභාවිතං, සද්ධින්ද්රියස්ස භාවිතත්තා සුභාවිතත්තා අස්සද්ධියං පහීනං හොති සුප්පහීනං, කොසජ්ජස්ස පහීනත්තා සුප්පහීනත්තා විරියින්ද්රියං භාවිතං හොති සුභාවිතං, විරියින්ද්රියස්ස භාවිතත්තා සුභාවිතත්තා කොසජ්ජං පහීනං හොති සුප්පහීනං, පමාදස්ස පහීනත්තා සුප්පහීනත්තා සතින්ද්රියං භාවිතං හොති සුභාවිතං, සතින්ද්රියස්ස භාවිතත්තා සුභාවිතත්තා පමාදො පහීනො හොති සුප්පහීනො, උද්ධච්චස්ස පහීනත්තා සුප්පහීනත්තා සමාධින්ද්රියං භාවිතං හොති සුභාවිතං, සමාධින්ද්රියස්ස භාවිතත්තා සුභාවිතත්තා උද්ධච්චං පහීනං හොති සුප්පහීනං, අවිජ්ජජය පහීනත්තා සුප්පහීනත්තා පඤ්ඤින්ද්රියං භාවිතං හොති සුභාවිතං, පඤ්ඤින්ද්රියස්ස භාවිතත්තා සුභාවිතත්තා අවිජ්ජා පහීනා හොති සුප්පහීනා.

ඉමෙහි දසහාකාරෙහි පඤ්චින්ද්රියානි භාවිතානි හොන්ති සුභාවිතානි.

කතිහාකාරෙහි පඤ්චින්ද්රියානි භාවියන්ති, කතිහාකාරෙහි පඤ්චින්ද්රියානි භාවිතානි චෙව හොන්ති සුභාවිතානි ච, පටිප්පස්සද්ධානි ච සුප්පටිප්පස්සද්ධානි ච: චතූහාකාරෙහි පඤ්චින්ද්රියානි භාවීයන්ති, චතූහාකාරෙහි පඤ්චින්ද්රියානි භාවිතානි චෙව හොන්ති සුභාවිතානි ච, පටිප්පස්සද්ධානි ච සුප්පටිප්පස්සද්ධානි ච.

සොතාපත්තිමග්ගක්ඛණෙ පඤ්චින්ද්රියානි භාවීයන්ති, සොතාපත්තිඵලක්ඛණෙ පඤ්චින්ද්රියානි භාවිතානි චෙව හොන්ති සුභාවිතානි ච, පටිප්පස්සද්ධානි ච සුප්පටිප්පස්සද්ධානි ච, සකදාගාමිමග්ගක්ඛණෙ පඤ්චින්ද්රියානි භාවීයන්ති, සකදාගාමිඵලක්ඛණෙ පඤ්චින්ද්රියානි භාවිතානි චෙව හොන්ති සුභාවිතානි ච. පටිප්පස්සද්ධානි ච සුප්පටිප්පස්සද්ධානි ච, අනාගාමිමග්ගක්ඛණෙ පඤ්චින්ද්රියානි භාවීයන්ති, අනාගාමිඵලක්ඛණෙ පඤ්චින්ද්රියානි භාවිතානි චෙ ව හොන්ති සුභාවිතානි ච පටිප්පස්සද්ධානි ච සුප්පටිප්පස්සද්ධානි ච, අරහත්තමග්ගක්ඛණෙ පඤ්චින්ද්රියානි භාවීයන්ති, අරහත්තඵලක්ඛණෙ පඤ්චින්ද්රියානි භාවිතානි චෙව හොන්ති සුභාවිතානි ච, පටිප්පස්සද්ධානි ච සුප්පටිප්පස්සද්ධානි ච.