විනිච්ඡයා යානි පකප්පිතානීති - ‘විනිච්ඡයා’ වුච්චන්ති ද්වාසට්ඨිදිට්ඨිගතානි; පකප්පිතානීති - කප්පිතා පකප්පිතා අභිසඞ්ඛතා සණ්ඨපිතාතිපි පකප්පිතානි; අථවා, අනිච්චා සඞ්ඛතා පටිච්චසමුප්පන්නා ඛයධම්මා වයධම්මා විරාගධම්මා නිරොධධම්මා විපරිණාමධම්මාතිපි පකප්පිතානීති විනිච්ඡයා යානි පකප්පිතානි; ඉති මාගන්දියොති - ‘ඉතී’ති පදසන්ධි පදසංසග්ගො පදපාරිපූරි අක්ඛරසමවායො බ්යඤ්ජනසිලිට්ඨතා පදානුපුබ්බතා නාමෙතං ‘ඉතී’ති; මාගන්දියොති - තස්ස බ්රාහ්මණස්ස නාමං සඞ්ඛා සමඤ්ඤා පඤ්ඤත්ති වොහාරොති ‘ඉති මාගන්දියො.’

තෙ වෙ මුනි බ්රූසි අනුග්ගහාය අජ්ඣත්තසන්තීති යමෙතමත්ථන්ති ‘තෙ වෙ’ ති ද්වාසට්ඨිදිට්ඨිගතානි; මුනීති - මොනං වුච්චති ඤාණං -පෙ- සඞ්ගජාලමතිච්ච සො මුනීති; අනුග්ගහායාති - දිට්ඨීසු ආදීනවං පස්සන්තො දිට්ඨියො න ගණ්හාමි න පරාමසාමි නාභිනිවිසාමීති ච භණසි අජ්ඣත්තසන්තීති ච භණසි; යමෙතමත්ථන්ති - යං පරමත්ථන්ති - ‘තෙ චෙ මුනි බ්රූසි අනුග්ගහාය අජ්ඣත්තසන්තීති යමෙතමත්ථං.’

කථන්නු ධීරෙහි පවෙදිතං තන්ති - ‘කථන්නූ’ති පදං සංසයපුච්ඡා විමතිපුච්ඡා ද්වෙළ්හකපුච්ඡා අනෙකංසපුච්ඡා, එවන්නුඛො න නුඛො කින්නුඛො කථන්නුඛොති කථන්නු; ධීරෙහීති - ධීරෙහි පණ්ඩිතෙහි පඤ්ඤාවන්තෙහි බුද්ධිමන්තෙහි ඤාණීහි විභාවීහි මෙධාවීහි; පවෙදිතන්ති වෙදිතං පවෙදිතං ආචික්ඛිතං දෙසිතං පඤ්ඤාපිතං පට්ඨපිතං විභත්තං උත්තානීකතං පකාසිතන්ති ‘කථන්නු ධීරෙහි පවෙදිතං තං’.

න දිට්ඨියා න සුතියා න ඤාණෙනාති - දිට්ඨියාපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි න භණාමි න දීපයාමි; න වොහරාමි සුතියාපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි, න භණාමි, න දීපයාමි න වොහරාමි දිට්ඨියා සුතියාපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ. න කථෙමි, න භණාමි, දීපයාමි, න වොහරාමි; ඤාණෙනපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි, න භණාමි න දීපයාමි, න වොහරාමීති - න දිට්ඨියා න සුතියා න ඤාණෙන. මාගන්දියාති භගවාති - ‘මාගන්දියා’ති භගවා තං බ්රාහ්මණං නාමෙන ආලපති; භගවාති - ගාරවාධිවචනං -පෙ- භගවා සච්ඡිකාපඤ්ඤත්ති’ යදිදං ‘භගවා’ති - ‘මාගන්දියාති භගවා.’

සීලබ්බතෙනාති න සුද්ධිමාහාති - සීලෙනපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි, න භණාමි, න දීපයාමි, න වොහරාමි; වතෙනපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි, න භණාමි, න දීපයාමි, න වොහරාමි; සීලබ්බතෙනාපි සුද්ධිං විසුද්ධිං පරිසුද්ධිං මුත්තිං විමුත්තිං පරිමුත්තිං නාහ, න කථෙමි, න භණාමි, න දීපයාමි, න වොහරාමීති ‘සීලබ්බතෙනාපි න සුද්ධිමාහ.’