එවම්පි විග්ගය්හ විවාදයන්තීති - එවං ගහෙත්වා උග්ගහෙත්වා ගණ්හිත්වා පරාමසිත්වා අභිනිවිසිත්වා විවාදයන්ති, කලහං කරොන්ති, භණ්ඩනං කරොන්ති, විග්ගහං කරොන්ති, විවාදං කරොන්ති, මෙධගං කරොන්ති; ‘න ත්වං ඉමං ධම්මවිනයං ආජානාසි -පෙ- නිබ්බෙඨෙහි වා සචෙ පහොසී’ති - එවම්පි විග්ගය්හ විවාදයන්ති.

බාලො පරො අක්කුසලොති චාහූති - පරො බාලො හීනො නිහීනො ඔමකො ලාමකො ඡත්තකො පරිත්තො අකුසලො අවිද්වා අවිජ්ජාගතො අඤ්ඤාණී අවිභාවී දුප්පඤ්ඤොති එවමාහංසු, එවං කථෙන්ති, එවං භණන්ති, එවං දීපයන්ති, එවං වොහරන්තීති - බාලො පරො අකුසලො’ති චාහු.

සච්චො නු වාදො කතමො ඉමෙසන්ති - ඉමෙසං සමණබ්රාහ්මණානං කතමො සච්චො තච්ඡො තථො භූතො යාථාවො අවිපරීතොති සච්චො නු වාදො කතමො ඉමෙසං.

සබ්බෙව හි’මෙ කුසලාවදානාති - සබ්බෙපි ඉමෙ සමණබ්රාහ්මණා කුසලවාදා පණ්ඩිතවාදී ථිරවාදා ඤායවාදා හෙතුවාදා ලක්ඛණවාදා කාරණවාදා ඨානවාදා සකාය ලද්ධියාති - සබ්බෙව හි’මෙ කුසලාවදානා,

පරස්ස චෙ ධම්මමනානුජානන්ති - පරස්ස ධම්මං පටිපදං මග්ගං අනනු ජානන්තො අනනුපස්සන්තො අනනුමනන්තො අනනුමඤ්ඤන්තො අනනුමොදන්තොති - පරස්ස චෙ ධම්මමනානුජානං.

බාලො මගො හොති නිහීනපඤ්ඤො’ති - පරො බාලො හොති, හීනො නිහීනො ඔමකො ලාමකො ඡත්තකො පරිත්තො හීනපඤ්ඤො නිහීනපඤ්ඤො ඔමකපඤ්ඤො ලාමකපඤ්ඤො ඡත්තකපඤ්ඤො පරිත්තපඤ්ඤො’ති - බාලො මගො හොති නිහීනපඤ්ඤො.

සබ්බෙව බාලා සුනිහීනපඤ්ඤාති - සබ්බෙවිමෙ සමණබ්රාහ්මණා බාලා හීනා නිහීනා ඔමකා ලාමකා ඡත්තකා පරිත්තා, සබ්බෙව හීනපඤ්ඤා නිහීනපඤ්ඤා ඔමකපඤ්ඤා ලාමකපඤ්ඤා ඡත්තකපඤ්ඤා පරිත්තපඤ්ඤා’ති - සබ්බෙව බාලා සුනිහීනපඤ්ඤා.