සකායනෙ වාපි දළ්හං වදානොති - ධම්මො සකායනං, දිට්ඨි සකායනං, පටිපදා සකායනං, මග්ගො සකායනං සකායනෙ දළ්හවාදො ථිරවාදො බලිකවාදො අවට්ඨිතවාදොති - සකායනෙ වාපි දළ්හං වදානො.

කං තත්ථ බාලොති පරං දහෙය්යාති - තත්ථාති සකාය දිට්ඨියා සකාය ඛන්තියා සකාය රුචියා සකාය ලද්ධියා පරං බාලතො හීනතො නිහීනතො ඔමකතො ලාමකතො ඡත්තකතො පරිත්තතො කං දහෙය්ය? කං පස්සෙය්ය? කං දක්ඛෙය්ය? කං ඔලොකෙය්ය? කං නිජ්ඣායෙය්ය? කං උපපරික්ඛෙය්යාති - කං තත්ථ බාලොති පරං දහෙය්ය.

සයංව සො මෙධගමාවහෙය්ය පරං වදං බාලමසුද්ධිධම්මන්ති - පරො බාලො හීනො නිහීනො ඔමකො ලාමකො ඡත්තකො පරිත්තො අසුද්ධිධම්මො අවිසුද්ධිධම්මො අපරිසුද්ධිධම්මො අවොදාතධම්මොති එවං වදන්තො එවං කථෙන්තො එවං භණන්තො එව දීපයන්තො එවං වොහරන්තො සයමෙව කලහං භණ්ඩනං විග්ගහං විවාදං මෙධගං ආවහෙය්ය සමාවහෙය්ය ආහරෙය්ය සමාහරෙය්ය ආකඩ්ඪෙය්ය සමාකඩ්ඪෙය්ය ගණ්හෙය්ය පරාමසෙය්ය අභිනිවිසෙය්යාති - සයංව සො මෙධගමාවහෙය්ය පරං වදං බාලමසුද්ධිධම්මං.

විනිච්ඡයෙ ඨත්වා සයං පමායාති - ‘විනිච්ඡයා: වුච්චන්ති ද්වාසට්ඨි දිට්ඨිගතානි; විනිච්ඡයදිට්ඨියා ඨත්වා පතිට්ඨහිත්වා ගණ්හිත්වා පරාමසිත්වා අභිනිවිසිත්වාති විනිච්ඡයෙ ඨත්වා; සයං පාමායාති සයං පමාය පමිණිත්වා අයං සත්ථා සබ්බඤ්ඤූ’ති සයං පමාය පමිණිත්වා අයං ධම්මො ස්වාක්ඛාතො, අයං ගණො සුපටිපන්නො, අයං දිට්ඨි භද්දිකා, අයං පටිපදා සුපඤ්ඤත්තා, අයං මග්ගො නීයානිකො’ති සයං පමාය පමිණිත්වාති - විනිච්ඡයෙ ඨත්වා සයං පමාය.