කථං සමෙතස්ස විභොති රූපන්ති - ‘කථං සමෙතස්සා’ති කථං සමෙතස්ස, කථං පටිපන්නස්ස, කථං ඉරීයන්තස්ස, කථං වත්තන්තස්ස, කතං පාලෙන්තස්ස, කථං යපෙන්තස්ස, කථං යාපෙන්තස්ස රූපං විභොති, විභාවීයති අතික්කමීයති සමතික්කමීයති, වීතිවත්තීයතීති - කථං සමෙතස්ස විභොති රූපං.

සුඛං දුඛං වාපි කථං විභොතීති - සුඛං ච දුක්ඛං ච කථං විභොති විභාවීයති අතික්කමීයති සමතික්කමීයති වීතිවත්තීයතීති - සුඛං දුඛං වාපි කථං විභොති.

එතං මෙ පබ්රූහි යථා විභොතීති - ‘එත’න්ති යං පුච්ඡාමි, යං යාචාමි, යං අජ්ඣෙසාමි යං පසාදෙමීති එතං; මෙ පබ්රූහීති මෙ පබ්රූහි ආචික්ඛ දෙසෙහි පඤ්ඤපෙහි පට්ඨපෙහි විවර විභජ උත්තානීකරොහි පකාසෙහීති එතං මෙ පබ්රූහි; යථා විභොතීති යථා විභොති විභාවීයති අතික්කමීයති සමතික්කමීයති වීතිවත්තීයතීති - එතං මෙ පබ්රූහි යථා විභොති.

තං ජානිස්සාම ඉති මෙ මනො අහූති - ‘තඤ්ජානිස්සාමා’ති තං ජානෙය්යාම ආජානෙය්යාම විජානෙය්යාම පටිවිජානෙය්යාම පටිවිජ්ඣෙය්යාමා’ති; තං ජානිස්සාම; ඉති මෙ මනො අහූති ඉති මෙ මනො අහූ, ඉති මෙ චිත්තං අහු, ඉති මෙ සඞ්කප්පො අහු, ඉති මෙ විඤ්ඤාණං අහූති - තං ජානිස්සාම ඉති මෙ මනො අහු.

න සඤ්ඤසඤ්ඤී න විසඤ්ඤසඤ්ඤීති - සඤ්ඤසඤ්ඤිනො වුච්චන්ති යෙ පකතිසඤ්ඤාය ඨිතා, නපි සො පකතිසඤ්ඤාය ඨිතො; විසඤ්ඤාසඤ්ඤිනො වුච්චන්ති උම්මත්තකා, යෙ ච ඛිත්තචිත්තා; නපි සො උම්මත්තකො, නොපි ඛිත්තචිත්තොති - න සඤ්ඤසඤ්ඤී න විසඤ්ඤසඤ්ඤී.