1. 4.
“ඛෙත්තං වත්ථුං හිරඤ්ඤං වා ගවාස්සං දාසපොරිසං,
ථියො බන්ධු පුථූ කාමෙ යො නරො අනුගිජ්ඣති”.
ථියො බන්ධු පුථූ කාමෙ යො නරො අනුගිජ්ඣති”.
ඛෙත්තං වත්ථුං හිරඤ්ඤං වා ති - ‘ඛෙත්ත’න්ති සාලික්ඛෙත්තං වීහික්ඛෙත්තං මුග්ගක්ඛෙත්තං මාසක්ඛෙත්තං යවක්ඛෙත්තං ගොධූමක්ඛෙත්තං තිලක්ඛෙත්තං;
වත්ථුන්ති - ඝරවත්ථුං කොට්ඨකවත්ථුං පුරෙවත්ථුං පච්ඡාවත්ථුං ආරාමවත්ථුං විහාරවත්ථුං, හිරඤ්ඤන්ති - හිරඤ්ඤං වුච්චති කහාපණොති ‘ඛෙත්තං වත්ථුං හිරඤ්ඤං වා’
ගවාස්සං දාසපොරිසන්ති - ‘ගවා’ති ගාවො වුච්චන්ති. අස්සාති පසුකාදයො වුච්චන්ති. දාසාති - චත්තාරො දාසා: අන්තොජාතකො දාසො, ධනක්කීතකො දාසො, සාමං වා දාසව්යං උපෙති, අකාමතො වා දාසව්යං උපෙති.
1. “ආමාය දාසා’පි භවන්ති හෙකෙ
ධනෙන කීතාපි භවන්ති දාසා,
සාමං ච එකෙ උපයන්ති දාස්යං
භයා පණුන්නාපි භවන්ති දාසා”ති.
ධනෙන කීතාපි භවන්ති දාසා,
සාමං ච එකෙ උපයන්ති දාස්යං
භයා පණුන්නාපි භවන්ති දාසා”ති.
පුරිසාති - තයො පුරිසා: භතකා කම්මකරා උපජීවිනොති ‘ගවාස්සං දාසපොරිසං.’
ථියො බන්ධු පථූකාමෙ’ති - ‘ථියො ති ඉත්ථිපරිග්ගහො වුච්චති. බන්ධූති - චත්තාරො බන්ධූ: ඤාතිබන්ධවාපි බන්ධූ, ගොත්තබන්ධවාපි බන්ධූ, මන්තබන්ධවාපි බන්ධූ, සිප්පබන්ධවාපි බන්ධූ. පුථූ කාමෙති බහූ කාමෙ, එතෙ පුථූකාමා: මනාපිකා රූපා -පෙ- මනාපිකා ඵොට්ඨබ්බාති ‘ථියො බන්ධූ පුථූ කාමෙ.’
යො නරො අනුගිජ්ඣතීති - ‘යො’ති යො යාදිසො යථායුත්තො යථා විහිතො යථාපකාරො යං ඨානං පත්තො යංධම්මසමන්නාගතො ඛත්තියො වා බ්රාහ්මණො වා වෙස්සො වා සුද්දො වා ගහට්ඨො වා පබ්බජිතො වා දෙවො වා මනුස්සො වා. නරොති - සත්තො නරො මානවො පොසො පුග්ගලො ජීවො ජාගූ ජන්තු ඉන්දගූ මනුජො, අනුගිජ්ඣතීති - කිලෙසකාමෙන වත්ථුකාමෙසු ගිජ්ඣති අනුගිජ්ඣති පළිගිජ්ඣතීති ‘යො නරො අනුගිජ්ඣති’,
තෙනාහ භගවා:
“ඛෙත්තං වත්ථුං හිරඤ්ඤං වා ගවාස්සං දාසපොරිසං,
ථියො බන්ධු පුථූ කාමෙ යො නරො අනුගිජ්ඣතී”ති.
ථියො බන්ධු පුථූ කාමෙ යො නරො අනුගිජ්ඣතී”ති.
1. 5.
“අබලා නං බලීයන්ති මද්දන්තෙ නං පරිස්සයා,
තතො නං දුක්ඛමන්වෙති නාවං භින්නමිවොදකං”.
තතො නං දුක්ඛමන්වෙති නාවං භින්නමිවොදකං”.