1. නිධිං නිධෙති පුරිසො ගම්භීරෙ ඔදකන්තිකෙ
අත්ථෙ කිච්චෙ සමුප්පන්නෙ අත්ථාය මෙ භවිස්සති.

2. රාජතො වා දුරුත්තස්ස චොරතො පීළිතස්ස වා
ඉණස්ස වා පමොක්ඛාය දුබ්භික්ඛෙ ආපදාසු වා,
එතදත්ථාය ලොකස්මිං නිධි නාම නිධීයති.

3. තාව සුනිහිතො සන්තො ගම්භීරෙ ඔදකන්තිකෙ
න සබ්බො සබ්බදා එව තස්ස තං උපකප්පති.

4. නිධි වා ඨානා චවති සඤ්ඤා වාස්ස විමුය්හති.
නාගා වා අපනාමෙන්ති යක්ඛා වාපි හරන්ති නං.

5. අප්පියා වාපි දායාදා උද්ධරන්ති අපස්සතො
යදා පුඤ්ඤක්ඛයො හොති සබ්බමෙතං විනස්සති

6. යස්ස දානෙන සීලෙන සංයමෙන දමෙන ච
නිධී සුනිහිතො හොති ඉත්ථියා පුරිසස්ස වා

7. චෙතියම්හි ච සඞ්ඝෙ වා පුග්ගලෙ අතිථීසු වා
මාතරි පිතරි වාපි අථො ජෙට්ඨම්හි භාතරි

8. එසො නිධි සුනිහිතො අජෙය්යො අනුගාමිකො
පහාය ගමනීයෙසු එතං ආදාය ගච්ඡති.

9. අසාධාරණමඤ්ඤෙසං අචොරහරණො නිධි
කයිරාථ ධීරො පුඤ්ඤානි යො නිධී අනුගාමිකො

10. එස දෙවමනුස්සානං සබ්බකාමදදො නිධි
යං යදෙවාහිපත්ථෙන්ති සබ්බමෙතෙන ලබ්භති.

11. සුවණ්ණතා සුස්සරතා සුසණ්ඨාන සුරූපතා
ආධිපච්චපරිවාරං සබ්බමෙතෙන ලබ්භති.

12. පදෙසරජ්ජං ඉස්සරිය, චක්කවත්තිසුඛං පියං
දෙවරජ්ජම්පි දිබ්බෙසු සබ්බමෙතෙන ලබ්භති.

13. මානුසිකා ච සම්පත්ති දෙවලොකෙ ච යා රති
යා ච නිබ්බාණසම්පත්ති සබ්බමෙතෙන ලබ්භති.

14. මිත්තසම්පදමාගම්ම යොනිසොව පයුඤ්ජතො.
විජ්ජාවිමුත්තිවසීභාවො සබ්බමෙතෙන ලබ්භති.