3. 5. 8.
[කල්යාණසීල සුත්තං]
97. වුත්තං හෙතං භගවතා. වුත්තමරහතා’ති මෙ සුතං:
1. කල්යාණසීලො භික්ඛවෙ භික්ඛු කල්යාණධම්මො කල්යාණපඤ්ඤො ඉමස්මිං ධම්මවිනයෙ කෙවලී වුසිතවා උත්තමපුරිසො’ති වුච්චති.
කථඤ්ච භික්ඛවෙ භික්ඛු කල්යාණසීලො හොති? ඉධ භික්ඛවෙ භික්ඛු සීලවා හොති පාතිමොක්ඛසංවරසංවුතො විහරති, ආචාරගොචරසම්පන්නො අණුමත්තෙසු වජ්ජෙසු භයදස්සාවී සමාදාය සික්ඛති සික්ඛාපදෙසු. එවං ඛො භික්ඛවෙ භික්ඛු කල්යාණසීලො හොති. ඉති කල්යාණසීලො.
“කල්යාණධම්මො ච කථං හොති? ඉධ භික්ඛවෙ භික්ඛු සත්තන්නං බොධිපක්ඛියානං ධම්මානං භාවනානුයොගමනුයුත්තො විහරති. එවං ඛො භික්ඛවෙ භික්ඛු කල්යාණධම්මො හොති. ඉති කල්යාණසීලො කල්යාණධම්මො.
කල්යාණපඤ්ඤො ච කථං හොති? ඉධ භික්ඛවෙ භික්ඛු ආසවානං ඛයා අනාසවං චෙතොවිමුත්තිං පඤ්ඤාවිමුත්තිං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහරති. එවං ඛො භික්ඛවෙ භික්ඛු කල්යාණපඤ්ඤො හොති. ඉති කල්යාණසීලො කල්යාණධම්මො කල්යාණපඤ්ඤො ඉමස්මිං ධම්මවිනයෙ කෙවලී වුසිතවා උත්තමපුරිසො’ති වුච්චතීති.
එතමත්ථං භගවා අවොච. තත්ථෙතං ඉති වුච්චති:
2. “යස්ස කායෙන වාචාය මනසා නත්ථි දුක්කටං,
තං වෙ කල්යාණසීලො’ති ආහු භික්ඛුං හිරීමනං.
3. යස්ස ධම්මා සුභාවිතා සත්ත සම්බොධගාමිනො,
තං වෙ කල්යාණධම්මො’ති ආහු භික්ඛුං අනුස්සදං.
4. යො දුක්ඛස්ස පජානාති ඉධෙව ඛයමත්තනො,
තං වෙ කල්යාණපඤ්ඤො’ති, ආහු භික්ඛුං අනාසවං.
5. තෙහි ධම්මෙහි සම්පන්නං අනීඝං ඡින්නසංසයං,
අසිතං සබ්බලොකස්ස ආහු සබ්බපහායිනන්ති”.
අයම්පි අත්ථො වුත්තො භගවතා. ඉති මෙ සුතන්ති.
3. 5. 9.
[දානසුත්තං]
98. වුත්තං හෙතං භගවතා. වුත්තමරහතා’ති මෙ සුතං:
1. ද්වෙමානි භික්ඛවෙ දානානි ආමිසදානඤ්ච ධම්මදානඤ්ච. එතදග්ගං භික්ඛවෙ ඉමෙසං ද්වින්නං දානානං යදිදං ධම්මදානං. ද්වෙමෙ භික්ඛවෙ සංවිභාගා ආමිසසංවිභාගො ච ධම්මසංවිභාගො ච. එතදග්ගං භික්ඛවෙ ඉමෙසං ද්වින්නං සංවිභාගානං යදිදං ධම්මසංවිභාගො. ද්වෙමෙ භික්ඛවෙ අනුග්ගහා ආමිසානුග්ගහො ච ධම්මානුග්ගහො ච. එතදග්ගං භික්ඛවෙ ඉමෙසං ද්වින්නං අනුග්ගහානං යදිදං ධම්මානුග්ගහොති.
එතමත්ථං භගවා අවොච. තත්ථෙතං ඉති වුච්චති:
2. “යමාහු දානං පරමං අනුත්තරං
යං සංවිභාගං භගවා අවණ්ණයි,
අග්ගම්හි ඛෙත්තම්හි පසන්නචිත්තො
විඤ්ඤූ පජානං කො න යජෙථ කාලෙ.
3. යෙ චෙව භාසන්ති සුණන්ති චූභයං
පසන්නචිත්තා සුගතස්ස සාසනෙ,
තෙසං සො අත්ථො පරමො විසුජ්ඣති
යෙ අප්පමත්තා සුගතස්ස සාසනෙ”ති.
අයම්පි අත්ථො වුත්තො භගවතා. ඉති මෙ සුතන්ති.