3. 3. 7.
[සුඛපත්ථනාසුත්තං]
76. වුත්තං හෙතං භගවතා. වුත්තමරහතා’ති මෙ සුතං:
1. තීණිමානි භික්ඛවෙ සුඛානි පත්ථයමානො සීලං රක්ඛෙය්ය පණ්ඩිතො. කතමානි තීණි? ‘පසංසා මෙ ආගච්ඡතූ’ති සීලං රක්ඛෙය්ය පණ්ඩිතො, භොගා මෙ උප්පජ්ජන්තූ’ති සීලං රක්ඛෙය්ය පණ්ඩිතො, කායස්ස භෙදා පරම්මරණා සුගතිං සග්ගං ලොකං උපපජ්ජිස්සාමීති සීලං රක්ඛෙය්ය පණ්ඩිතො. ඉමානි ඛො භික්ඛවෙ තීණි සුඛානි පත්ථයමානො සීලං රක්ඛෙය්ය පණ්ඩිතො’ති.
එතමත්ථං භගවා අවොච. තත්ථෙතං ඉති වුච්චති:
2. “සීලං රක්ඛෙය්ය මෙධාවී පත්ථයානො තයො සුඛෙ,
පසංසං විත්තලාභඤ්ච පෙච්ච සග්ගෙ පමොදනං.
පසංසං විත්තලාභඤ්ච පෙච්ච සග්ගෙ පමොදනං.
3. අකරොන්තො’පි චෙ පාපං කරොන්තමුපසෙවති,
සඞ්කියො හොති පාපස්මිං අවණ්ණො චස්ස රූහති.
සඞ්කියො හොති පාපස්මිං අවණ්ණො චස්ස රූහති.
4. යාදිසං කුරුතෙ මිත්තං යාදිසං චූපසෙවති,
ස වෙ තාදිසකො හොති සහවාසො’පි තාදිසො.
ස වෙ තාදිසකො හොති සහවාසො’පි තාදිසො.
5. සෙවමානො සෙවමාන, සම්ඵුට්ඨො සම්ඵුසං පරං,
සරො දිද්ධො කලාපං’ව, අලිත්තමුපලිම්පති,
උපලෙපභයා ධීරො නෙව පාපසඛා සියා.
සරො දිද්ධො කලාපං’ව, අලිත්තමුපලිම්පති,
උපලෙපභයා ධීරො නෙව පාපසඛා සියා.
6. පූතිමච්ඡං කුසග්ගෙන යො නරො උපනය්හති,
කුසා’පි පූතී වායන්ති එවං බාලූපසෙවනා.
කුසා’පි පූතී වායන්ති එවං බාලූපසෙවනා.
7. තගරඤ්ච පලාසෙන යො නරො උපනය්හති,
පත්තා’පි සුරභි වායන්ති එවං ධීරූපසෙවනා.
පත්තා’පි සුරභි වායන්ති එවං ධීරූපසෙවනා.
8. තස්මා පත්තපුටස්සෙව ඤත්වා සම්පාකමත්තනො,
අසන්තෙ නොපසෙවෙය්ය සන්තෙ සෙවෙය්ය පණ්ඩිතො,
අසන්තො නිරයං නෙන්ති සන්තො පාපෙන්ති සුග්ගති”න්ති.
අසන්තෙ නොපසෙවෙය්ය සන්තෙ සෙවෙය්ය පණ්ඩිතො,
අසන්තො නිරයං නෙන්ති සන්තො පාපෙන්ති සුග්ගති”න්ති.
අයම්පි අත්ථො වුත්තො භගවතා, ඉති මෙ සුතන්ති.
3. 3. 8.
[භිදුරසුත්තං]
77. වුත්තං හෙතං භගවතා. වුත්තමරහතා’ති මෙ සුතං:
1. භිදුරායං භික්ඛවෙ කායො විඤ්ඤාණං විරාගධම්මං සබ්බෙ උපධී අනිච්චා දුක්ඛා විපරිණාමධම්මා’ති.
එතමත්ථං භගවා අවොච. තත්ථෙතං ඉති වුච්චති:
2. “කායං ච භිදුරං ඤත්වා විඤ්ඤාණං ච පභඞ්ගුරං
උපධීසු භයං දිස්වා ජාතිමරණමච්චගා
සම්පත්වා පරමං සන්තිං කාලං කඞ්ඛති භාවිතත්තො’ති.”
උපධීසු භයං දිස්වා ජාතිමරණමච්චගා
සම්පත්වා පරමං සන්තිං කාලං කඞ්ඛති භාවිතත්තො’ති.”
අයම්පි අත්ථො වුත්තො භගවතා. ඉති මෙ සුතන්ති.