3. 2. 4.
[අද්ධාසුත්තං]
63. වුත්තං හෙතං භගවතා වුත්තමරහතා’ති මෙ සුතං.
1. “තයො’මෙ භික්ඛවෙ අද්ධා. කතමෙ තයො? අතීතො අද්ධා, අනාගතො අද්ධා, පච්චුප්පන්නො අද්ධා. ඉමෙ ඛො භික්ඛවෙ තයො අද්ධා’ති.
එතමත්ථං භගවා අවොච. තත්ථෙතං ඉති වුච්චති:
2. “අක්ඛෙය්යසඤ්ඤිනො සත්තා අක්ඛෙය්යස්මිං පතිට්ඨිතා,
අක්ඛෙය්යං අපරිඤ්ඤාය යොගමායන්ති මච්චුනො.
අක්ඛෙය්යං අපරිඤ්ඤාය යොගමායන්ති මච්චුනො.
3. අක්ඛෙය්යඤ්ච පරිඤ්ඤාය අක්ඛාතාරං න මඤ්ඤති,
ඵුට්ඨො විමොක්ඛො මනසා සන්තිපදමනුත්තරං.
ඵුට්ඨො විමොක්ඛො මනසා සන්තිපදමනුත්තරං.
4. ස වෙ අක්ඛෙය්යසම්පන්නො සන්තො සන්තිපදෙ රතො,
සඞ්ඛාය සෙවී ධම්මට්ඨො සඞ්ඛ්යං නොපෙති වෙදගූ”ති.
සඞ්ඛාය සෙවී ධම්මට්ඨො සඞ්ඛ්යං නොපෙති වෙදගූ”ති.
අයම්පි අත්ථො වුත්තො භගවතා, ඉති මෙ සුතන්ති.
3. 2. 5.
[දුච්චරිත සුත්තං]
64. වුත්තං හෙතං භගවතා. වුත්තමරහතා’ති මෙ සුතං:
1. තීණිමානි භික්ඛවෙ දුච්චරිතානි. කතමානි තීණි? කායදුච්චරිතං, වචීදුච්චරිතං, මනොදුච්චරිතං. ඉමානි ඛො භික්ඛවෙ තීණි දුච්චරිතානී”ති.
එතමත්ථං භගවා අවොච. තත්ථෙ’තං ඉති වුච්චති:
2. “කායදුච්චරිතං කත්වා වචීදුච්චරිතානි ච,
මනොදුච්චරිතං කත්වා යඤ්චඤ්ඤං දොසසඤ්හිතං.
මනොදුච්චරිතං කත්වා යඤ්චඤ්ඤං දොසසඤ්හිතං.
3. අකත්වා කුසලං කම්මං කත්වානාකුසලං බහුං,
කායස්ස භෙදා දුප්පඤ්ඤො නිරයං සො’පපජ්ජතී”ති.
කායස්ස භෙදා දුප්පඤ්ඤො නිරයං සො’පපජ්ජතී”ති.
අයම්පි අත්ථො වුත්තො භගවතා. ඉති මෙ සුතන්ති.
3. 2. 6.
[සුචරිතසුත්තං]
65. වුත්තං හෙතං භගවතා. වුත්තමරහතාති මෙ සුතං –
1. තීණිමානි භික්ඛවෙ සුචරිතානි. කතමානි තීණි? කායසුචරිතං, වචීසුචරිතං, මනොසුචරිතං. ඉමානි ඛො භික්ඛවෙ තීණි සුචරිතානී”ති.
එතමත්ථං භගවා අවොච. තත්ථෙතං ඉති වුච්චති:
2. “කායදුච්චරිතං හිත්වා වචීදුච්චරිතානි ච,
මනොදුච්චරිතං හිත්වා යඤ්චඤ්ඤං දොසසංහිතං.
මනොදුච්චරිතං හිත්වා යඤ්චඤ්ඤං දොසසංහිතං.
3. අකත්වා’කුසලං කම්මං කත්වාන කුසලං බහුං
කායස්ස භෙදා සප්පඤ්ඤො සග්ගං සො උපපජ්ජතී”ති.
කායස්ස භෙදා සප්පඤ්ඤො සග්ගං සො උපපජ්ජතී”ති.
අයම්පි අත්ථො වුත්තො භගවතා. ඉති මෙ සුතන්ති.