දුතියරාගසුත්තං < ඛුද්දකනිකායො | බුද්ධ ජයන්ති ත්‍රිපිටකය

3. 2. 10.

[දුතියරාගසුත්තං]

69. වුත්තං හෙතං භගවතා. වුත්තමරහතා’ති මෙ සුතං:

1. යස්ස කස්සචි භික්ඛවෙ භික්ඛුස්ස වා භික්ඛුනියා වා රාගො අප්පහීනො දොසො අප්පහීනො මොහො අප්පහීනො. අයං වුච්චති භික්ඛවෙ න අතරි සමුද්දං සඌමිං සවීචිං සාවට්ටං සගහං සරක්ඛසං.

යස්ස කස්සචි භික්ඛවෙ භික්ඛුස්ස වා භික්ඛුනියා වා රාගො පහීනො දොසො පහීනො මොහො පහීනො, අයං වුච්චති භික්ඛවෙ අතරි සමුද්දං සඌමිං සවීචිං සාවට්ටං සගහං සරක්ඛසං, තිණ්ණො පාරගතො, ථලෙ තිට්ඨති බ්රාහ්මණො’ති.

එතමත්ථං භගවා අවොච. තත්ථෙතං ඉති වුච්චති:

2. “යස්ස රාගො ච දොසො ච අවිජ්ජා ච විරාජිතා
සො’මං සමුද්දං සගහං සරක්ඛසං
සඌමිභයං දුත්තරමච්චතාරි
සඞ්ගාතිගො මච්චුජහො නිරූපධි
පහාසි දුක්ඛං අපුනබ්භවාය,
අත්ථං ගතො සො න පමාණමෙ’ති,
අමොහයී මච්චුරාජන්ති බ්රූමී”ති.

අයම්පි අත්ථො වුත්තො භගවතා, ඉති මෙ සුතන්ති.

දුතියො වග්ගො.

තස්සුද්දානං:

පුඤ්ඤං චක්ඛු අථ ඉන්ද්රියානි අද්ධා ච චරිතං දුවෙ සොචි
මුනො අථ රාගදුවෙ පුන වග්ගමාහු දුතියමුත්තමන්ති.

තතියවග්ගො

3. 3. 1.

[මිච්ඡාදිට්ඨිකම්මසමාදානසුත්තං.]

70. වුත්තං හෙතං භගවතා. වුත්තමරහතා’ති මෙ සුතං:

1. දිට්ඨා මයා භික්ඛවෙ සත්තා කායදුච්චරිතෙන සමන්නාගතා වචීදුච්චරිතෙන සමන්නාගතා මනොදුච්චරිතෙන සමන්නාගතා, අරියානං උපවාදකා, මිච්ඡාදිට්ඨිකා මිච්ඡාදිට්ඨිකම්මසමාදානා. තෙ කායස්ස භෙදා පරම්මරණා අපායං දුග්ගතිං විනිපාතං නිරයං උපපන්නා.

තං ඛො පනාහං භික්ඛවෙ නාඤ්ඤස්ස සමණස්ස වා බ්රාහ්මණස්ස වා සුත්වා වදාමි.

දිට්ඨා මයා භික්ඛවෙ සත්තා කායදුච්චරිතෙන සමන්නාගතා වචීදුච්චරිතෙන සමන්නාගතා මනොදුච්චරිතෙන සමන්නාගතා, අරියානං උපවාදකා, මිච්ඡාදිට්ඨිකා මිච්ඡාදිට්ඨිකම්මසමාදානා. තෙ කායස්ස භෙදා පරම්මරණා අපායං දුග්ගතිං විනිපාතං නිරයං උපපන්නා.

අපි ච භික්ඛවෙ යදෙව සාමං ඤාතං සාමං දිට්ඨං සාමං විදිතං තදෙවාහං වදාමි.

එතමත්ථං භගවා අවොච. තත්ථෙතං ඉති වුච්චති:

2. “මිච්ඡා මනං පනිධාය මිච්ඡා වාචං ච භාසිය,
මිච්ඡා කම්මානි කත්වාන කායෙන ඉධ පුග්ගලො.

3. අප්පස්සුතො’පුඤ්ඤකරො අප්පස්මිං ඉධ ජීවිතෙ,
කායස්ස භෙදා දුප්පඤ්ඤො නිරයං සො උපපජ්ජතී”ති.

අයම්පි අත්ථො වුත්තො භගවතා. ඉති මෙ සුතන්ති.