1. 2. 9.
[සඞ්ඝසාමග්ගිසුත්තං]
19. වුත්තං හෙතං භගවතා. වුත්තමරහතා’ති මෙ සුතං:
1. එකධම්මොභික්ඛවෙ ලොකෙ උප්පජ්ජමානො උප්පජ්ජති බහුජනහිතාය බහුජනසුඛාය බහුනො ජනස්ස අත්ථාය හිතාය සුඛාය දෙවමනුස්සානං. කතමො එක ධම්මො? සඞ්ඝසාමග්ගි. සඞ්ඝෙ ඛො පන භික්ඛවෙ සමග්ගෙ න චෙව අඤ්ඤමඤ්ඤං භණ්ඩනානි හොන්ති, න ච අඤ්ඤමඤ්ඤං පරිභාසා හොන්ති, න ච අඤ්ඤමඤ්ඤං පරික්ඛෙපා හොන්ති, න ච අඤ්ඤමඤ්ඤං පරිච්චජනා හොන්ති. තත්ථ අප්පසන්නා චෙව පසීදන්ති, පසන්නානඤ්ච භිය්යොභාවො හොතී’ති.
එතමත්ථං භගවා අවොච. තත්ථෙතං ඉති වුච්චති:
2. “සුඛා සඞ්ඝස්ස සාමග්ගී සමග්ගානඤ්චනුග්ගහො
සමග්ගරතො ධම්මට්ඨො යොගක්ඛෙමා න ධංසති,
සඞ්ඝං සමග්ගං කත්වාන කප්පං සග්ගම්හි මොදතී’ති.
සමග්ගරතො ධම්මට්ඨො යොගක්ඛෙමා න ධංසති,
සඞ්ඝං සමග්ගං කත්වාන කප්පං සග්ගම්හි මොදතී’ති.
අයම්පි අත්ථො වුත්තො භගවතා, ඉති මෙ සුතන්ති.
1. 2. 10.
[පදුට්ඨපුග්ගලසුත්තං]
20. වුත්තං හෙතං භගවතා. වුත්තමරහතා’ති මෙ සුතං:
1. ඉදාහං භික්ඛවෙ එකච්චං පුග්ගලං පදුට්ඨචිත්තං එවං චෙතසා චෙතො පරිච්ච පජානාමි: “ඉමම්හි චායං සමයෙ පුග්ගලො කාලං කරෙය්ය, යථාභතං නික්ඛිත්තො, එවං නිරයෙ. තං කිස්ස හෙතු: චිත්තඤ්හි’ස්ස භික්ඛවෙ පදුට්ඨං. චෙතොපදොසහෙතු ඛො පන භික්ඛවෙ එවමිධෙකච්චෙ සත්තා කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජන්තී”ති.
එතමත්ථං භගවා අවොච. තත්ථෙතං ඉති වුච්චති:
2. “පදුට්ඨචිත්තං ඤත්වාන එකච්චං ඉධ පුග්ගලං,
එතමත්ථඤ්ච ව්යාකාසි බුද්ධො භික්ඛූන සන්තිකෙ.
එතමත්ථඤ්ච ව්යාකාසි බුද්ධො භික්ඛූන සන්තිකෙ.
3. ඉමම්හි චායං සමයෙ කාලං කයිරාථ පුග්ගලො,
නිරයං උපපජ්ජෙය්ය චිත්තඤ්හි’ස්ස පදූසිතං.”
නිරයං උපපජ්ජෙය්ය චිත්තඤ්හි’ස්ස පදූසිතං.”
4. යථා’හරිත්වා නික්ඛිපෙය්ය එවමෙව තථාවිධා
චෙතොපදොසහෙතූ හි සත්තා ගච්ඡන්ති දුග්ගති”න්ති
චෙතොපදොසහෙතූ හි සත්තා ගච්ඡන්ති දුග්ගති”න්ති
අයම්පි අත්ථො වුත්තො භගවතා. ඉති මෙ සුතන්ති.
වග්ගො දුතියො.
තස්සුද්දාන:
මොහො කොධො අථ මක්ඛො විජ්ජා තණ්හා සෙඛා දුවෙ,
භෙදො සාමග්ගි පුග්ගලො ච වග්ගමාහු දුතියන්ති වුච්චති.
භෙදො සාමග්ගි පුග්ගලො ච වග්ගමාහු දුතියන්ති වුච්චති.
තතියො වග්ගො
1. 3. 1.
[පසන්නචිත්ත සුත්තං]
21. වුත්තං හෙතං භගවතා. වුත්තමරහතා’ති මෙ සුතං.
1. ඉදාහං භික්ඛවෙ එකච්චං පුග්ගලං පසන්නචිත්තං එවං චෙතසා චෙතො පරිච්ච පජානාමි: “ඉමම්හි චායං සමයෙ පුග්ගලො කාලං කරෙය්ය යථා’භතං නික්ඛිත්තො එවං සග්ගෙ. තං කිස්ස හෙතු? චිත්තඤ්හි’ස්ස භික්ඛවෙ පසන්නං. චෙතොපසාද හෙතු ඛො පන භික්ඛවෙ එවමිධෙකච්චෙ සත්තා කායස්ස භෙදා පරම්මරණා සුගතිං සග්ගං ලොකං උපපජ්ජන්තී ති.
එතමත්ථං භගවා අවොච. තත්ථෙතං ඉති වුච්චති:
2. “පසන්න චිත්තං ඤත්වාන එකච්චං ඉධ පුග්ගලං,
එතමත්ථං ච ව්යාකාසි බුද්ධො භික්ඛූන සන්තිකෙ
එතමත්ථං ච ව්යාකාසි බුද්ධො භික්ඛූන සන්තිකෙ
3. ඉමම්හි චායං සමයෙ කාලං කයිරාථ පුග්ගලො,
සුගතිං උපපජ්ජෙය්ය චිත්තඤ්හි’ස්ස පසාදිතං.
සුගතිං උපපජ්ජෙය්ය චිත්තඤ්හි’ස්ස පසාදිතං.
4. යථා’හරිත්වා නික්ඛිපෙය්ය එවමෙව තථාවිධො
චෙතොපසාදහෙතූ හි සත්තා ගච්ඡන්ති සුග්ගති”න්ති.
චෙතොපසාදහෙතූ හි සත්තා ගච්ඡන්ති සුග්ගති”න්ති.
අයම්පි අත්ථො වුත්තො භගවතා. ඉති මෙ සුතන්ති.