1. 2. 2.
[කොධපරිඤ්ඤා සුත්තං]
12. වුත්තං හෙතං භගවතා. වුත්තමරහතා’ති මෙ සුතං:
1. කොධං භික්ඛවෙ අනභිජානං අපරිජානං තත්ථ චිත්තං අවිරාජයං අප්පජහං අභබ්බො දුක්ඛක්ඛයාය. කොධඤ්ච ඛො භික්ඛවෙ අභිජානං පරිජානං තත්ථ චිත්තං විරාජයං පජහං භබ්බො දුක්ඛක්ඛයායා’ති.
එතමත්ථං භගවා අවොච. තත්ථෙතං ඉති වුච්චති:
2. “යෙන කොධෙන කුද්ධා සෙ සත්තා ගච්ඡන්ති දුග්ගතිං
තං කොධං සම්මදඤ්ඤාය පජහන්ති විපස්සිනො.
පහාය න පුනායන්ති ඉමං ලොකං කුදාචන”න්ති.
අයම්පි අත්ථො වුත්තො භගවතා. ඉති මෙ සුතන්ති.
1. 2. 3.
[මක්ඛපරිඤ්ඤා සුත්තං]
13. වුත්තං හෙතං භගවතා. වුත්තමරහතා’ති මෙ සුතං.
1. මක්ඛං භික්ඛවෙ අනභිජානං අපරිජානං තත්ථ චිත්තං අවිරාජයං අප්පජහං අභබ්බො දුක්ඛක්ඛයාය. මක්ඛඤ්ච ඛො භික්ඛවෙ අභිජානං පරිජානං තත්ථ චිත්තං විරාජයං පජහං භබ්බො දුක්ඛක්ඛයායා’ති.
එතමත්ථං භගවා අවොච තත්ථෙතං ඉති වුච්චති:
2. “යෙන මක්ඛෙන මක්ඛා සෙ සත්තා ගච්ඡන්ති දුග්ගතිං
තං මක්ඛං සම්මදඤ්ඤාය පජහන්ති විපස්සිනො
පහාය න පුනායන්ති ඉමං ලොකං කුදාචන”න්ති.
අයම්පි අත්ථො වුත්තො භගවතා. ඉති මෙ සුතන්ති.
1. 2. 4.
[අවිජ්ජානීවරණා සුත්තං]
14. වුත්තං හෙතං භගවතා. වුත්තමරහතා’ති මෙ සුතං.
1. නාහං භික්ඛවෙ අඤ්ඤං එකනීවරණම්පි සමනුපස්සාමි යෙන නීවරණෙන නිවුතා පජා දීඝරත්තං සන්ධාවන්ති සංසරන්ති යථයිදං භික්ඛවෙ අවිජ්ජානීවරණං. අවිජ්ජානීවරණෙන හි භික්ඛවෙ නිවුතා පජා දීඝරත්තං සන්ධාවන්ති සංසරන්තී’ති.
එතමත්ථං භගවා අවොච. තත්ථෙතං ඉති වුච්චති:
2. “නත්ථඤ්ඤො එකධම්මො’පි යෙනෙවං නිවුතා පජා.
සංසරන්ති අහොරත්තං යථා මොහෙන ආවුතා.
3. “යෙ ච මොහං පහත්වාන තමොඛන්ධං පදාළයුං
න තෙ පුන සංසරන්ති හෙතු තෙසං න විජ්ජතී”ති.
අයම්පි අත්ථො වුත්තො භගවතා. ඉති මෙ සුතන්ති.