1. 1. 8.
[මානපරිඤ්ඤාසුත්තං]
8. වුත්තං හෙතං භගවතා. වුත්තමරහතා’ති මෙ සුතං:
1. මානං භික්ඛවෙ අනභිජානං අපරිජානං තත්ථ චිත්තං අවිරාජයං අප්පජහං අභබ්බො දුක්ඛක්ඛයාය. මානං ච ඛො භික්ඛවෙ අභිජානං පරිජානං තත්ථ චිත්තං විරාජයං පජහං භබ්බො දුක්ඛක්ඛයායා’ති.
එතමත්ථං භගවා අවොච. තත්ථෙතං ඉති වුච්චති:
2. “මානුපෙතා අයං පජා මානගන්ථා භවෙ රතා
මානං අපරිජානන්තා ආගන්තාරො පුනබ්භවං
යෙ ච මානං පහත්වාන, විමුත්තා මානසඞ්ඛයෙ.
තෙ මානගන්ථාභිභුනො සබ්බදුක්ඛමුපච්චගු”න්ති.
අයම්පි අත්ථො වුත්තො භගවතා, ඉති මෙ සුතන්ති.
1. 1. 9.
[ලොභපරිඤ්ඤාසුත්තං]
9. වුත්තං හෙතං භගවතා. වුත්තමරහතා’ති මෙ සුතං:
1. ලොභං භික්ඛවෙ අනභිජානං අපරිජානං තත්ථ චිත්තං අවිරාජයං අප්පජහං අභබ්බො දුක්ඛක්ඛයාය. ලොභං ච ඛො භික්ඛවෙ අභිජානං පරිජානං තත්ථ චිත්තං විරාජයං පජහං භබ්බො දුක්ඛක්ඛයායා’ති.
එතමත්ථං භගවා අවොච. තත්ථෙතං ඉති වුච්චති:
2. “යෙන ලොභෙන ලුද්ධා සෙ සත්තා ගච්ඡන්ති දුග්ගතිං
තං ලොභං සම්මදඤ්ඤාය පජහන්ති විපස්සිනො
පහාය න පුනායන්ති ඉමං ලොකං කුදාචන”න්ති.
අයම්පි අත්ථො වුත්තො භගවතා ඉති මෙ සුතන්ති.
1. 1. 10.
[දොසපරිඤ්ඤාසුත්තං]
10. වුත්තං හෙතං භගවතා. වුත්තමරහතා’ති මෙ සුතං:
1. දොසං භික්ඛවෙ අනභිජානං අපරිජානං තත්ථ චිත්තං අවිරාජයං අප්පජහං අභබ්බො දුක්ඛක්ඛයාය. දොසඤ්ච ඛො භික්ඛවෙ අභිජානං පරිජානං තත්ථ චිත්තං විරාජයං පජහං භබ්බො දුක්ඛක්ඛයායාති.
එතමත්ථං භගවා අවොච. තත්ථෙතං ඉති වුච්චති:
2. “යෙන දොසෙන දුට්ඨා සෙ සත්තා ගච්ඡන්ති දුග්ගතිං
තං දොසං සම්මදඤ්ඤාය පජහන්ති විපස්සිනො
පහාය න පුනායන්ති ඉමං ලොකං කුදාචන”න්ති.
අයම්පි අත්ථො වුත්තො භගවතා. ඉති මෙ සුතන්ති.
[පාටිභොගවග්ගො පඨමො.]
තස්සුද්දානං:
රාගදොසා අථ මොහො කොධමක්ඛා මානං සබ්බං
මානතො ලොභදොසා පුන පකාසිතා වග්ගමාහු පඨමන්ති.