1.(100) සහස්සම්පි චෙ වාචා අනත්ථපදසංහිතා
එකං අත්ථපදං සෙය්යො යං සුත්වා උපසම්මති.

2.(101) සහස්සම්පි චෙ ගාථා අනත්ථපදසංහිතා
එකං ගාථාපදං සෙය්යො යං සුත්වා උපසම්මති.

3.(102) යො චෙ ගාථාසතං භාසෙ අනත්ථපදසංහිතං
එකං ධම්මපදං සෙය්යො යං සුත්වා උපසම්මති.

4.(103) යො සහස්සං සහස්සෙන සඞ්ගාමෙ මානුසෙ ජිනෙ
එකඤ්ච ජෙය්ය අත්තානං ස වෙ සඞ්ගාමජුත්තමො.

5.(104) අත්තා හවෙ ජිතං සෙය්යො යා චායං ඉතරා පජා
අත්තදන්තස්ස පොසස්ස නිච්චං සඤ්ඤතචාරිනො.

6.(105) නෙව දෙවො න ගන්ධබ්බො න මාරො සහ බ්රහ්මුනා
ජිතං අපජිතං කයිරා තථාරූපස්ස ජන්තුනො.

7.(106) මාසෙ මාසෙ සහස්සෙන යො යජෙථ සතං සමං
එකඤ්ච භාවිතත්තානං මුහුත්තමපි පූජයෙ
සා යෙව පූජනා සෙය්යා, යඤ්චෙ වස්සසතං හුතං.

8.(107) යො ච වස්සසතං ජන්තු අග්ගිං පරිචරෙ වනෙ
එකඤ්ච භාවිතත්තානං මුහුත්තමපි පූජයෙ
සා යෙව පූජනා සෙය්යා යඤ්චෙ වස්සසතං හුතං.

9.(108) යං කිඤ්චි යිට්ඨං ව හුතං ව ලොකෙ
සංවච්ඡරං යජෙථ පුඤ්ඤපෙක්ඛො
සබ්බම්පි තං න චතුභාගමෙති
අභිවාදනා උජ්ජුගතෙසු සෙය්යා.

10.(109) අභිවාදනසීලිස්ස නිච්චං වද්ධාපචායිනො
චත්තාරො ධම්මා වඩ්ඪන්ති ආයු වණ්ණො සුඛං බලං.