1.(383) ඡින්ද සොතං පරක්කම්ම කාමෙ පනුද බ්රාහ්මණ
සඞ්ඛාරානං ඛයං ඤත්වා අකතඤ්ඤූ’සි බ්රාහ්මණ.

2.(384) යදා ද්වයෙසු ධම්මෙසු පාරගූ හොති බ්රාහ්මණො
අථස්ස සබ්බෙ සංයොගා අත්ථං ගච්ඡන්ති ජානතො.

3.(385) යස්ස පාරං අපාරං වා පාරාපාරං න විජ්ජති
වීතද්දරං විසංයුත්තං තමහං බ්රූමි බ්රාහ්මණං.

4.(386) ඣායිං විරජමාසීනං කතකිච්චං අනාසවං
උත්තමත්ථං අනුප්පත්තං තමහං බ්රූමි බ්රාහ්මණං.

5.(387) දිවා තපති ආදිච්චො රත්තිං ආභාති චන්දිමා
සන්නද්ධො ඛත්තියො තපති ඣායී තපති බ්රාහ්මණො
අථ සබ්බමහොරත්තිං බුද්ධො තපති තෙජසා.

6.(388) බාහිතපාපො’ති බ්රාහ්මණො සමචරියා සමණො’ති වුච්චති.
පබ්බාජයත්තනො මලං තස්මා පබ්බජිතො’ති වුච්චති.

7.(389) න බ්රාහ්මණස්ස පහරෙය්ය නාස්ස මුඤ්චෙථ බ්රාහ්මණො
ධී බ්රාහ්මණස්ස හන්තාරං තතො ධී යස්ස මුඤ්චති.

8.(390) න බ්රාහ්මණස්සෙතදකිඤ්චි සෙය්යො
යදා නිසෙධො මනසො පියෙහි
යතො යතො හිංසමනො නිවත්තති
තතො තතො සම්මති මෙව දුක්ඛං.

9.(391) යස්ස කායෙන වාචාය මනසා නත්ථි දුක්කතං
සංවුතං තීහි ඨානෙහි තමහං බ්රූමි බ්රාහ්මණං.

10.(392) යම්හා ධම්මං විජානෙය්ය සම්මාසම්බුද්ධදෙසිතං
සක්කච්චං තං නමස්සෙය්ය අග්ගිහුත්තං’ව බ්රාහ්මණො.