1.(221) කොධං ජහෙ විප්පජහෙය්ය මානං
සඤ්ඤොජනං සබ්බමතික්කමෙය්යෙ
තං නාමරූපස්මිං අසජ්ජමානං
අකිඤ්චනං නානුපතන්ති දුක්ඛා.

2.(222) යො චෙ උප්පතිතං කොධං රථං භන්තං’ව ධාරයෙ
තමහං සාරථිං බ්රූමි රස්මිග්ගාහො ඉතරො ජනො.

3.(223) අක්කොධෙන ජිනෙ කොධං අසාධුං සාධුනා ජිනෙ
ජිනෙ කදරියං දානෙන සච්චෙන අලිකවාදිනං.

4.(224) සච්චං භණෙ න කුජ්ඣෙය්ය දජ්ජාප්පසමිම්පි යාචිතො
එතෙහි තීහි ඨානෙහි ගච්ඡෙ දෙවාන සන්තිකෙ.

5.(225) අහිංසකා යෙ මුනයො නිච්චං කායෙනසංවුතා
තෙ යන්ති අච්චුතං ඨානං යත්ථ ගන්ත්වා න සොචරෙ.

6.(226) සදා ජාගරමානානං අහොරත්තානුසික්ඛිනං
නිබ්බානං අධිමුත්තානං අත්ථං ගච්ඡන්ති ආසවා.

7.(227) පොරාණමෙතං අතුල නෙතං අජ්ජතනාමිව
නින්දන්ති තුණ්හිමාසීනං නින්දන්ති බහුභාණිනං
මිතභාණිම්පි නින්දන්ති නත්ථි ලොකෙ අනින්දිතො.

8.(228) න චාහු න ච භවිස්සති න චෙතරහි විජ්ජති
එකන්තං නින්දිතො පොසො එකන්තං වා පසංසිතො.

9.(229) යං චෙ විඤ්ඤූ පසංසන්ති අනුවිච්ච සුවෙ සුවෙ
අච්ඡිද්දවුත්තිං මෙධාවිං පඤ්ඤාසීලසමාහිතං.

10.(230) නෙක්ඛං ජම්බොනදස්සෙව කො තං නින්දිතුමරහති
දෙවා’පි නං පසංසන්ති බ්රහ්මුනා’පි පසංසිතො.

11.(231) කායප්පකොපං රක්ඛෙය්ය කායෙන සංවුතො සියා
කායදුච්චරිතං හිත්වා කායෙන සුචරිතං චරෙ.

12.(232) වචීපකොපං රක්ඛෙය්ය වාචාය සංවුතො සියා
වචීදුච්චරිතං හිත්වා වාචාය සුචරිතං චරෙ.

13.(233) මනොපකොපං රක්ඛෙය්ය මනසා සංවුතො සියා
මනොදුච්චරිතං හිත්වා මනසා සුචරිතං චරෙ.