1.(129) සබ්බෙ තසන්ති දණ්ඩස්ස සබ්බෙ භායන්ති මච්චුනො
අත්තානං උපමං කත්වා න හනෙය්ය න ඝාතයෙ.

2.(130) සබ්බෙ තසන්ති දණ්ඩස්ස සබ්බෙසං ජීවිතං පියං.
අත්තානං උපමං කත්වා න හනෙය්ය න ඝාතයෙ.

3.(131) සුඛකාමානි භූතානි යො දණ්ඩෙන විහිංසති
අත්තනො සුඛමෙසානො පෙච්ච සො න ලභතෙ සුඛං.

4.(132) සුඛකාමානි භූතානි යො දණ්ඩෙන න හිංසති
අත්තනො සුඛමෙසානො පෙච්ච සො ලභතෙ සුඛං.

5.(133) මා’වොච ඵරුසං කඤ්චි වුත්තා පටිවදෙය්යු තං
දුක්ඛා හි සාරම්භකථා පටිදණ්ඩා ඵුසෙය්යු තං.

6.(134) ස චෙ නෙරෙසි අත්තානං කංසො උපහතො යථා
එස පත්තො’සි නිබ්බානං සාරම්භො තෙ න විජ්ජති.

7.(135) යථා දණ්ඩෙන ගොපාලො ගාවො පාචෙති ගොචරං
එවං ජරා ච මච්චු ච ආයුං පාචෙන්ති පාණිනං.

8.(136) අථ පාපානි කම්මානි කරං බාලො න බුජ්ඣති
සෙහි කම්මෙහි දුම්මෙධො අග්ගිදඩ්ඪො’ව තප්පති.

9.(137) යො දණ්ඩෙන අදණ්ඩෙසු අප්පදුට්ඨෙසු දුස්සති
දසන්නමඤ්ඤතරං ඨානං ඛිප්පමෙව නිගච්ඡති.

10.(138) වෙදනං ඵරුසං ජානිං සරීරස්ස ච භෙදනං
ගරුකං වාපි ආබාධං චිත්තක්ඛෙපං ව පාපුණෙ.

11.(139) රාජතො වා උපස්සග්ගං අබ්භක්ඛානං ව දාරුණං
පරික්ඛයං ව ඤාතීනං භොගානං ව පභඞ්ගුරං.

12.(140) අථ වාස්ස අගාරානි අග්ගි ඩහති පාවකො
කායස්ස භෙදා දුප්පඤ්ඤො නිරයං සො උපපජ්ජති.

13.(141) න නග්ගචරියා න ජටා න පඞ්කා
නානාසකා ථණ්ඩිලසායිකා වා
රාජො ච ජල්ලං උක්කුටිකප්පධානං
සොධෙන්ති මච්චං අවිතිණ්ණකඞ්ඛං.

14.(142) අලඞ්කතො චෙ’පි සමං චරෙය්ය
සන්තො දන්තො නියතො බ්රහ්මචාරී
සබ්බෙසු භූතෙසු නිධාය දණ්ඩං
සො බ්රාහ්මණො සො සමණො ස භික්ඛු.