1. කප්පෙ ච සතසහස්සෙ ච චතුරො ච අසඞ්ඛියෙ
අමරං නාම නගරං දස්සනෙය්යං මනොරමං.

2. දසහි සද්දෙහි අවිවිත්තං අන්නපානසමායුතං
හත්ථිසද්දං අස්සසද්දං භෙරිසඞ්ඛරථානි ච
ඛාදථ පිවථ චෙව අන්නපානෙන ඝොසිතං.

3. නගරං සබ්බඞ්ගසම්පන්නං සබ්බකම්මමුපාගතං
සත්තරතනසම්පන්නං නානාජනසමාකුලං
සමිද්ධං දෙවනගරංව ආවාසං පුඤ්ඤකම්මිනං.

4. නගරෙ අමරවතියා සුමෙධො නාම බ්රාහ්මණො
අනෙකකොටිනිචයො පහූතධනධඤ්ඤවා.

5. අජ්ඣායකො මන්තධරො තිණ්ණං වෙදානපාරගූ
ලක්ඛණෙ ඉතිහාසෙ ච සධම්මෙ පාරමිං ගතො.

6. රහොගතො නිසීදිත්වා එවං චින්තෙසහං තදා
දුක්ඛො පුනබ්භවො නාම සරීරස්ස ච භෙදනං
(සම්මොහමරණං දුක්ඛං ජරාය අභිමද්දනං.)

7. ජාතිධම්මො ජරාධම්මො ව්යාධිධම්මො ච’හං සදා
අජරං අමරං ඛෙමං පරියෙසිස්සාමි නිබ්බුතිං.

8. යන්නූනිමං පූතිකායං නානා කුණපපූරිතං
ඡඩ්ඩයිත්වාන ගච්ඡෙය්යං අනපෙඛො අනත්ථිකො.

9. අත්ථි හෙහිති සො මග්ගො න සො සක්කා න හෙතුයෙ
පරියෙසිස්සාමි තං මග්ගං භවතො පරිමුත්තියා.

10. යථා’පි දුක්ඛෙ විජ්ජන්තෙ සුඛං නාම’පි විජ්ජතී
එවං භවෙ විජ්ජමානෙ විභවො’පි ඉච්ඡිතබ්බකො.

11. යථා’පි උණ්හෙ විජ්ජන්තෙ අපරං විජ්ජති සීතලං
එවං තිවිධග්ගි විජ්ජන්තෙ නිබ්බානං ඉච්ඡිතබ්බකං.

12. යථා’පි පාපෙ විජ්ජන්තෙ කල්යාණම්පි විජ්ජති
එවමෙව ජාති විජ්ජන්තෙ අජාතිපිච්ඡිතබ්බකා

13. යථා ගූථගතො පුරිසො තළාකං දිස්වාන පූරිතං
න ගවෙසති තං තළාකං න දොසො තළාකස්ස සො.

14. එවං කිලෙසමලධොවං විජ්ජන්තෙ අමතන්තළෙ
න ගවෙසති තං තළාකං න දොසො අමතන්තළෙ.

15. යථා අරීහි පරිරුද්ධො විජ්ජන්තෙ ගමනංපථෙ.
න පලායති සො පුරිසො න දොසො අඤ්ජසස්ස සො.

16. එවං කිලෙසපරිරුද්ධො විජ්ජමානෙ සිවෙ පථෙ
න ගවෙසති තං මග්ගං න දොසො සිවමඤ්ජසෙ.

17. යථ’පි බ්යාධිතො පුරිසො විජ්ජමානෙ තිකිච්ඡකෙ
න තිකිච්ඡාපෙති තං ව්යාධිං න සො දොසො තිකිච්ඡකෙ.

18. එවං කිලෙසව්යාධීහි දුක්ඛිතො පරිපීළිතො.
න ගවෙසති තං ආචරියං න සො දොසො. විනායකෙ.

19. යථා’පි කුණපං පුරිසො කණ්ඨෙ බද්ධං ජිගුච්ඡිය
මොචයිත්වාන ගච්ඡෙය්ය සුඛී සෙරී සයං වසී.

20. තථෙ’විමං පූතිකායං නානා කුණපසඤ්චයං
ඡඩ්ඩයිත්වාන ගච්ඡෙය්යං අනපෙඛො අනත්ථිකො.

21. යථා උච්චාරඨානම්හි කරීසං නරනාරියො
ඡඩ්ඩයිත්ථාන ගච්ඡන්ති අනපෙඛා අනත්ථිකා.