1. සුජාතස්ස අපරෙන සයම්භූ ලොක නායකො
දුරාසදො අසමස පියදස්සී මහායසො.

2. සො’පි බුද්ධො අමිතයසො ආදිච්චො’ව විරොචති
නිහන්ත්වාන තමං සබ්බං ධම්මචක්කං පවත්තයී.

3. තස්සා’පි අතුලතෙජස්ස අහෙසුං අභිසමයා තයො
කොටිසතසහස්සානං පඨමා’භිසමයො අහු.

4. සුදස්සනො දෙවරාජා මිච්ඡාදිට්ඨිම’ රොචයී
තස්ස දිට්ඨිං විනොදෙන්තො සත්ථා ධම්මම’දෙසයී.

5. ජනසන්නිපාතො අතුලො මහාසන්නිපතී තදා
නවුතිකොටිසහස්සානං දුතියාභිසමයො අහු.

6. යදා දොණමුඛං හත්ථිං විනෙසි නරසාරථි
අසීතිකොටිසහස්සානං තතියා’භිසමයො අහු.

7. සන්නිපාතා තයො ආසුං තස්සා’පි පියදස්සිනො
කොටිසතසහස්සානං පඨමො ආසි සමාගමො.

8. තතො පරං නවුතිකොටී සමිංසු එකතො මුනී
තතියෙ සන්නිපාතම්හි අසීතිකොටියො අහු.

9. අහං තෙන සමයෙන කස්සපො නාම බ්රාහ්මණො
අජ්ඣායකො මන්තධරො තිණ්ණං වෙදානපාරගූ.

10. තස්ස ධම්මං සුණිත්වාන පසාදං ජනයිං අහං
කොටිසතසහස්සෙහි සඞ්ඝාරාමං අමාපයිං.

11. තස්ස දත්වාන ආරාමං හට්ඨො සංවිග්ගමානසො
සරණෙ පඤ්චසීලෙ ච දළ්හං කත්වා සමාදියිං

12. සො’පි මං බුද්ධො ව්යාකාසි සඞ්ඝමජ්ඣෙ නිසීදිය
අට්ඨාරසෙ කප්පසතෙ අයං බුද්ධො භවිස්සති.

13. අහු කපිලව්හයා රම්මා නික්ඛමිත්වා තථාගතො
පධානං පදහිත්වාන කත්වා දුක්කරකාරිකං.

14. අජපාලරුක්ඛමූලස්මිං නිසීදිත්වා තථාගතො
තත්ථ පායාසමග්ගය්හ නෙරඤ්ජරමුපෙහිති.

15. නෙරඤ්ජරාය තීරම්හි පායාසං ආදාය සො ජිනො
පටියත්තවරමග්ගෙන බොධිමූලං හි එහිති.

16. තතො පදක්ඛිණං කත්වා බොධිමණ්ඩං අනුත්තරො
අස්සත්ථරුක්ඛමූලම්හි බුජ්ඣිස්සති මහායසො.

17. ඉමස්ස ජනිකා මාතා මායා නාම භවිස්සති
පිතා සුද්ධොදනො නාම අයං හෙස්සති ගොතමො.

18. කොලිතො උපතිස්සො ච අග්ගා හෙස්සන්ති සාවකා
ආනන්දො නාමු’පට්ඨාකො උපට්ඨිස්සති තං ජිනං.

19. ඛෙමා උප්පලවණ්ණා ච අග්ගා හෙස්සන්ති සාවිකා.
බොධි තස්ස භගවතො අස්සත්ථො’ති පවුච්චති.

20. චිත්තො ච හත්ථාළවකො අග්ගා හෙස්සන්තු’පට්ඨකා
උත්තරා නන්දමාතා ච අග්ගා හෙස්සන්තු’පට්ඨිකා
ආයු වස්සසතං තස්ස ගොතමස්ස යසස්සිනො.

21. ඉදං සුත්වාන වචනං අසමස්ස මහෙසිනො
ආමොදිතා නරමරූ බුද්ධබීජඞ්කුරො අයං.

22. උක්කුට්ඨිසද්දං වත්තෙන්ති අප්ඵොටෙන්ති හසන්ති ච
කතඤ්ජලී නමස්සන්ති දසසහස්සී සදෙවකා.

23. යදි’මස්ස ලොකනාථස්ස විරජ්ඣිස්සාම සාසනං
අනාගතම්හි අද්ධානෙ හෙස්සාම සම්මුඛා ඉමං.

24. යථා මනුස්සා නදිං තරන්තා පටිතිත්ථං විරජ්ඣිය
හෙට්ඨාතිත්ථෙ ගහෙත්වාන උත්තරන්ති මහානදිං.

25. එවමෙ’ව මයං සබ්බෙ යදි මුඤ්චාමි’මං ජිනං
අනාගතම්හි අද්ධානෙ හෙස්සාම සම්මුඛා ඉමං.