639. පදුමුත්තරො නාම ජිනො සබ්බධම්මානපාරගූ
ඉතො සතසහස්සම්හි කප්පෙ උප්පජ්ජි නායකො.

640. තදාහං හංසවතියං ජාතා සෙට්ඨිකුලෙ අහුං.
නානාරතනපජ්ජොතෙ මහාසුඛසමප්පිතෙ.

641. උපෙත්වා තං මහාවීරං අස්සොසිං ධම්මදෙසනං
තතො ජාතප්පසාදා’හං උපෙසිං සරණං ජිනං.

642. තදා මහාකාරුණිකො පදුමුත්තරනාමකො
ඛිප්පභිඤ්ඤානමග්ගත්තෙ ඨපෙසි භික්ඛුනිං සුභං.

643. තං සුත්වා මුදිතා හුත්වා දානං දත්වා මහෙසිනො
නිපජ්ජ සිරසා පාදෙ තං ඨානං අභිපත්ථයිං.

644. අනුමොදි මහාවීරො භද්දෙ යං තෙ’භිපත්ථිතං
සමිජ්ඣිස්සති තං සබ්බං සුඛිනී හොහී නිබ්බුතා.

645. සතසහස්සෙ ඉතො කප්පෙ ඔක්කාකකුලසම්භවො
ගොතමො නාම ගොත්තෙන සත්ථා ලොකෙ භවිස්සති.

646. තස්ස ධම්මෙසු දායාදා ඔරසා ධම්මනිම්මිතා
භද්දා කුණ්ඩකෙසාති හෙස්සසි සත්ථුසාවිකා.

647. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසං අගච්ඡහං.

648. තතො චුතා යාමමගා තතො’හං තුසිතං ගතා
තතො ච නිම්මාණරතිං වසවත්තීපුරං තතො.

649. යත්ථ යත්ථූපපජ්ජාමි තස්ස කම්මස්ස වාහසා
තත්ථ තත්ථෙව රාජූනං මහෙසිත්තමකාරයිං.

650. තතො චුතා මනුස්සෙසු රාජූනං වසවත්තිනං
මණ්ඩලීනඤ්ච රාජූනං මහෙසිත්තමකාරයිං.

651. සම්පත්තිං අනුභොත්වාන දෙවෙසු මානුසෙසු ච
සබ්බත්ථ සුඛිතා හුත්වා නෙකකප්පෙසු සංසරිං.

652. ඉමස්මිං භද්දකෙ කප්පෙ බ්රහ්මබන්ධු මහායසො
කස්සපො නාම ගොත්තෙන උප්පජ්ජි වදතං වරො.

653. උපට්ඨාකො මහෙසිස්ස තදා ආසි නරිස්සරො
කාසිරාජා කිකී නාම බාරාණසි පුරුත්තමෙ.

654. තස්ස ධීතා චතුත්ථා’සිං භික්ඛුදාසීති විස්සුතා
ධම්මං සුත්වා ජිනග්ගස්ස පබ්බජ්ජං සමරොචයිං.

655. අනුජානි න නො තාතො අගාරෙව තදා මයං
වීසං වස්සසහස්සානි විචරිම්හ අතන්දිතා.

656. කොමාරිබ්රහ්මචරියං රාජකඤ්ඤා සුඛෙධිතා
බුද්ධුපට්ඨාන නිරතා මුදිතා සත්තධීතරො.

657. සමණී සමණගුත්තා ච භික්ඛුනී භික්ඛුදාසිකා
ධම්මා චෙව සුධම්මා ච සත්තමී සඞ්ඝදාසිකා.

658. ඛෙමා උප්පලවණ්ණා ච පටාචාරා අහං තථා
කිසාගොතමී ධම්මදින්නා විසාඛා හොති සත්තමී.

659. තෙහි කම්මෙහි සුකතෙහි චෙතනාපණිධීහි ච
ජහිත්වා මානුසං දෙහං තාවතිංසං අගච්ඡහං.

660. පච්ඡිමෙ ච භවෙදානි ගිරිබ්බජපුරුත්තමෙ
ජාතා සෙට්ඨිකුලෙ ඵීතෙ යදා’හං යොබ්බනෙ ඨිතා.

661. චොරං වධත්ථං නීයන්තං දිස්වා රත්තා තහිං අහං
පිතා මෙ තං සහස්සෙන මොචයිත්වා වධා තතො.

662. අදාසි තස්ස මං තාතො විදිත්වාන මනං මම
තස්සාහමාසිං විස්සත්ථා අතීව දයිතා හීතා.

663. සො මෙ භූසනලොභෙන ඛලිතජ්ඣාසයො දිසො
චොරප්පපාතං නෙත්වාන පබ්බතං චෙතයී වධං.