416. පදුමුත්තරනාමජිනො සබ්බධම්මෙසු චක්ඛුමා
ඉතො සතසහස්සම්හි කප්පෙ උප්පජ්ජි නායකො.

417. තදා’හං හංසවතියං ජාතා සෙට්ඨිකුලෙ අහුං
නානාරතනපජ්ජොතෙ මහාසුඛසමප්පිතා.

418. උපෙත්වා තං මහාවීරං අස්සොසිං ධම්මදෙසනං
තතො ජාතප්පසාදා’හං උපෙසිං සරණං ජිනං.

419. මාතරං පිතරං චාපි ආයාචිත්වා විනායකං
නිමන්තයිත්වා සත්තාහං භොජයිං සහසාවකං.

420. අතික්කන්තෙ ච සත්තාහෙ මහාපඤ්ඤානමුත්තමං.
භික්ඛුනිං එතදග්ගම්හි ඨපෙසි නරසාරථි.

421. තං සුත්වා මුදිතා හුත්වා පුනො තස්ස මහෙසිනො
කාරං කත්වාන තං ඨානං පණිපච්ච පණිදහිං.

422. තතො මං ස ජිනො ආහ “සිජ්ඣතං පණිධි තව
සසංඝෙ මෙ කතං කාරං අප්පමෙය්යඵලං තයා.

423. සතසහස්සෙ ඉතො කප්පෙ ඔක්කාකකුලම්හවො
ගොතමො නාම ගොත්තෙන සත්ථා ලොකෙ භවිස්සති.

424. තස්ස ධම්මෙසු දායාදා ඔරසා ධම්මනිම්මිතා
එතදග්ගං අනුප්පත්තා ඛෙමා නාම භවිස්සසි”.

425. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිංසූපගා අහං.

426. තතො චුතා යාමමගං තතො’හං තුසිතං ගතා
තතො ච නිම්මාණරතිං වසවත්තිපුරං තතො.

427. යත්ථ යත්ථූපපජ්ජාමි තස්ස කම්මස්ස වාහසා
තත්ථ තත්ථෙව රාජූනං මහෙසිත්තමකාරයිං.

428. තතො චුතා මනුස්සත්තෙ රාජූනං චක්කවත්තිනං.
මණ්ඩලීනඤ්ච රාජූනං මහෙසිත්තමකාරයිං.

429. සම්පත්තිං අනුභොත්වාන දෙවෙසු මනුජෙසු ච
සබ්බත්ථ සුඛිතා හුත්වා නෙකකප්පෙසු සංසරිං.

430. එකනවුතෙ ඉතො කප්පෙ විපස්සී ලොකනායකො
උප්පජ්ජි චාරුනයනො සබ්බධම්මවිපස්සකො.

431. තමහං ලොකනායකං උපෙත්වා නරසාරථිං.
ධම්මං පණීතං සුත්වාන පබ්බජිං අනගාරියං.

432. දසවස්සහස්සානි තස්ස වීරස්ස සාසනෙ
බ්රහ්මචරියං චරිත්වාන යුත්තයොගා බහුස්සුතා.

433. පච්චයාකාරකුසලා චතුසච්චවිසාරදා
නිපුණා චිත්තකථිකා සත්ථුසාසනකාරිකා.

434. තතො චුතාහං තුසිතං උපපන්නා යසස්සිනී
අහිභොසිං තහිං අඤ්ඤෙ බ්රහ්මචරියඵලෙන’හං

435. යත්ථ යත්ථූපපන්නා’හං මහාභොගා මහද්ධනා
මෙධාවිනී රූපවතී විනීතපරිසා’පි ච.

436. භවාමි තෙන කම්මෙන යොගෙන ජිනසාසනෙ
සබ්බා සම්පත්තියො මය්හං සුලභා මනසො පියා.

437. යොපි මෙ භවතෙ භත්තා යත්ථ යත්ථ ගතායපි
විමානෙති න මං කොචි පටිපත්තිඵලෙන මෙ.

438. ඉමස්මිං භද්දකෙ කප්පෙ බ්රහ්මබන්ධු මහායසො
නාමෙන කොණාගමනො උප්පජ්ජි වදතං වරො.

439. තදාහං බාරාණසියං සුසමිද්ධකුලප්පජා
ධනඤ්ජානි සුමෙධා ච අහම්පි ච තයො ජනා.

440. සඞ්ඝාරාමමදාසිම්හ දානසහායිකා පුරෙ
සඞ්ඝස්ස ච විහාරම්පි උද්දිස්ස කාරිකා මයං.