215. චන්දභාගානදීතීරෙ අහොසිං කින්නරී තදා,
අද්දසං විරජං බුද්ධං සයම්භුං අපරාජිතං.

216. පසන්නචිත්තා සුමනා වෙදජාතා කතඤ්ජලී,
සාලමාලං ගහෙත්වාන සයම්භුං අභිපූජයිං.

217. තෙන කම්මෙන සුකතෙන චෙතනාපණිධීහි ච,
ජහිත්වා කින්නරීදෙහං තාවතිංසමගච්ඡහං.

218. ඡත්තිංස දෙවරාජූනං මහෙසිත්තමකාරයිං,
මනසා පත්ථිතං මය්හං නිබ්බත්තති යථිච්ඡිතං.

219. දසන්නං චක්කවත්තීනං මහෙසිත්තමකාරයිං,
ඔචිතත්තාව හුත්වාන සංසරාමි භවෙස්වහං.

220. කුසලං විජ්ජතෙ මය්හං පබ්බජිං අනගාරියං,
පූජාරහා අහං අජ්ජ සක්යපුත්තස්ස සාසනෙ.

221. විසුද්ධමනසා අජ්ජ අපෙතමනපාපිකා,
සබ්බාසවාපරික්ඛීණා නත්ථිදානි පුනබ්භවො.

222. චතුනවුතෙ ඉතො කප්පෙ යං බුද්ධමභිපූජයිං,
දුග්ගතිං නාභිජානාමි සාලමාලායිදං ඵලං.

223-225. කිලෙසා ඣාපිතා මය්හං -පෙ- කතං බුද්ධස්ස සාසනං.

226. එකදා ලොකපජ්ජොතො වෙසාලියං මහාවනෙ,
කූටාගාරෙ සුසාලායං වසතෙ නරසාරථි.

227. තදා ජිනස්ස මාතුච්ඡා මහාගොතමි භික්ඛුනී,
තහිං කතෙ පුරෙ රම්මෙ වසී භික්ඛුනුපස්සයෙ.

228. භික්ඛුනීහි විමුත්තාහි සතෙහි සහ පඤ්චහි,
රහොගතාය තස්සෙවං චිත්තස්සාසි විතක්කිතං.

229. “බුද්ධස්ස පරිනිබ්බාණං සාවකග්ගයුගස්ස වා
රාහුලානන්දනන්දානං නාහං ලච්ඡාමි පස්සිතුං

230. පටිගච්චායුසඞ්ඛාරෙ ඔස්සජිත්වාන නිබ්බුතිං,
ගච්ඡෙය්යං ලොකනාථෙන අනුඤ්ඤාතා මහෙසිනා.”

231. තථා පඤ්චසතානම්පි භික්ඛුනීනං විතක්කිතං,
ආසි ඛෙමාදිකානම්පි එතදෙව විතක්කිතං.

232. භූමිචාලො තදා ආසි නාදිතා දෙවදුන්දුභි,
උපස්සයාධිවත්ථායො දෙවතා සොකපීළිතා.
විපලන්තා සකරුණං තථෙස්සූනි පවත්තයුං,

233. මිත්තා භික්ඛුනියො තා හි උපගන්ත්වාන ගොතමිං,
නිපච්ච සිරසා පාදෙ ඉදං වචනමබ්රවිං:

234. “තත්ථ තොයලවාසිත්තා මයමය්යෙ රහොගතා
සාචලා චලිතා භූමි නදිතා දෙවදුන්දුභි,
පරිදෙවා ච සූයන්ති කිමත්ථං නූන ගොතමී.”

235. තදා අවොච සා සබ්බං යථාපරිවිතක්කිතං,
තායොපි සබ්බා ආහංසු යථාපරිවිතක්කිතං.

236. “යදි තෙ රුචිතං අය්යෙ නිබ්බානං පරමං සිවං,
නිබ්බායිස්සාම සබ්බාපි බුද්ධානුඤ්ඤාය සුබ්බතෙ.

237. මයං සහාව නික්ඛන්තා ඝරාපි ව භවාපි ච
සහයෙව ගමිස්සාම නිබ්බාණපුරමුත්තමං”

238. නිබ්බානාය වජන්තීනං කිං වක්ඛාමීති” සා වදං
සහ සබ්බාහි නිග්ගච්ඡි භික්ඛුනීනිලයා තදා.