595. පදුමුත්තරො නාම ජිනො සබ්බධම්මානපාරගූ,
ඉතො සතසහස්සම්හි කප්පෙ උප්පජ්ජි නායකො.

596. තදාහං හංසවතියං ජාතා සෙට්ඨිකුලෙ අහුං
නානාරතනපජ්ජොතෙ මහාසුඛසමප්පිතා.

597. උපෙත්වා තං මහාවීරං අස්සොසිං ධම්මදෙසනං
තතො ජාතප්පසාදා’හං උපෙසිං සරණං ජිනං.

598. තතො විනයධාරීනං අග්ගං වණ්ණෙසි නායකො
භික්ඛුනිං ලජ්ජිනිං තාදිං කප්පාකප්පවිසාරදං.

599. තදා මුදිතචිත්තා’හං තං ඨානමභිකඞ්ඛිනී
නිමන්තෙත්වා දසබලං සසඞ්ඝං ලොකනායකං

600. භොජයිත්වාන සත්තාහං දදිත්වා ච තිචීවරං
නිපච්ච සිරසා පාදෙ ඉදං වචනමබ්රවිං:

601. “යා තයා වණ්ණිතා වීර ඉතො අට්ඨමකෙ’හනි
තාදිසා’හං භවිස්සාමි යදි සිජ්ඣති නායක.”

602. තදා අවොච මං සත්ථා “භද්දෙ මා භායි අස්සස
අනාගතම්හි අද්ධානෙ ලච්ඡසෙ තං මනොරථං.

603. සතසහස්සෙ ඉතො කප්පෙ ඔකකාකකුලසම්හවො
ගොතමො නාම ගොත්තෙන සත්ථා ලොකෙ භවිස්සති.

604. තස්ස ධම්මෙසු දායාදා ඔරසා ධම්මනිම්මිතා
පටාචාරාති නාමෙන හෙස්සසි සත්ථුසාවිකා.”

605. තදා’හං මුදිතා හුත්වා යාවජීවං තතො ජිනං.
මෙත්තචිත්තා පරිචරිං සසඞ්ඝං ලොකනායකං.

606. තෙන කම්මෙන සුකතෙන චෙතනාපණිධීහි ච
ජහිත්වා මානුසං දෙහං තාවතිසං අගච්ඡහං.

607. ඉමස්මිං භද්දකෙ කප්පෙ බ්රහ්මබන්ධු මහායසො
කස්සපො නාම ගොත්තෙන උප්පජ්ජි වදතං වරො.

608. උපට්ඨාකො මහෙසිස්ස තදා ආසි නරිස්සරො
කාසිරාජා කිකී නාම බාරාණසිපුරුත්තමෙ.

609. තස්සා’සිං තතියා ධීතා භික්ඛුනී ඉති විස්සුතා
ධම්මං සුත්වා ජිනග්ගස්ස පබ්බජ්ජං සමරොචයිං.

610. අනුජානි න නො තාතො අගාරෙව තදා මයං
වීසං වස්සසහස්සානි විචරිම්හ අතන්දිතා

611. කොමාරිබ්රහ්මචරියං රාජකඤ්ඤා සුඛෙධිතා
බුද්ධුපට්ඨාන නිරතා මුදිතා සත්ත ධීතරො.

612. සමණී සමණගුත්තා ච භික්ඛුනී භික්ඛුදාසිකා
ධම්මා චෙව සුධම්මා ච සත්තමී සඞ්ඝදාසිකා.

613. අහං උප්පලවණ්ණා ච ඛෙමා භද්දා ච භික්ඛුනී
කිසාගොතමී ධම්මදින්නා විසාඛා හොති සත්තමී.