91. නගරෙ හංසවතියා චාරිකී ආස’හං තදා,
ආරාමෙන ච ආරාමං චරාමි කුසලත්ථිකා.

92. කාලපක්ඛම්හි දිවසෙ අද්දසං බොධිමුත්තමං,
තත්ථ චිත්තං පසාදෙත්වා බොධිමූලෙ නිසීදහං.

93. ගරුචිත්තං උපට්ඨපෙත්වා සිරෙ කත්වාන අඤ්ජලිං,
සොමනස්සං පවෙදෙත්වා එවං චින්තෙසි තාවදෙ.

94. “යදි බුද්ධො අමිතගුණො අසමප්පටිපුග්ගලො,
දස්සෙතු පාටිහීරං මෙ බොධි ඔභාසතු අයං.”

95. සහ ආවජ්ජනා මය්හං බොධි පජ්ජලි තාවදෙ,
සබ්බසොණ්ණමයො ආසි දිසා සබ්බා විරොචයුං.

96. සත්තරත්තින්දිවං තත්ථ බොධිමූලෙ නිසීද’හං,
සත්තමෙ දිවසෙ පත්තෙ දීපපූජං අකාස’හං.

97. ආසනං පරිවාරෙත්වා පඤ්චදීපානි පජ්ජලුං,
යාව උදෙති සුරියො දීපා මෙ පජ්ජලුං තදා.

98. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

99. තත්ථ මෙ සුකතං ව්යම්හං පඤ්චදීපීති වුච්චති
සට්ඨියොජනමුබ්බෙධං තිංසයොජනවිත්ථතං.

100. අසඞ්ඛ්යානි දීපානි පරිවාරෙ ජලන්ති මෙ
යාවතා දෙවභවනං දීපාලොකෙන ජොතති.

101. පරම්මුඛා නිසීදිත්වා යදි ඉච්ඡාමි පස්සිතුං,
උද්ධං අධො ච තිරියං සබ්බං පස්සාමි චක්ඛුනා.

102. යාවතා අභිකඞ්ඛාමි දට්ඨුං සුගතදුග්ගතෙ,
තත්ථ ආවරණං නත්ථි රුක්ඛෙසු පබ්බතෙසු වා.

103. අසීති දෙවරාජූනං මහෙසිත්තමකාරයිං,
සතානං චක්කවත්තීනං මහෙසිත්තමකාරයිං.

104. යං යං යොනුපපජ්ජාමි දෙවත්තං අථ මානුසං,
දීපසතසහස්සානි පරිවාරෙත්වා ජලන්ති මං

105. දෙවලොකා චවිත්වාන උප්පජ්ජිං මාතුකුච්ඡියං,
මාතුකුච්ඡිගතං සන්තිං අක්ඛි මෙ න නිමීලති.

106. දීපසතසහස්සානි පුඤ්ඤකම්මසමඞ්ගිතා,
සූතිඝරෙ පජ්ජලන්ති පඤ්චදීපානිදං ඵලං.

107. පච්ඡිමෙ භවෙ සම්පත්තෙ මානසං විනිවට්ටයිං,
අජරාමරං සීතිභාවං නිබ්බානං ඵස්සයිං අහං.

108. ජාතියා සත්තවස්සා’හං අරහත්තමපාපුණිං,
උපසම්පාදයී බුද්ධො ගුණමඤ්ඤාය ගොතමො.

109. මණ්ඩපෙ රුක්ඛමූලෙ වා පාසාදෙසු ගුහාසු වා,
සුඤ්ඤාගාරෙ ච ඣායන්ත්යා පඤ්චදීපා ජලන්ති මෙ.

110. දිබ්බචක්ඛු විසුද්ධං මෙ සමාධිකුසලා අහං,
අභිඤ්ඤාපාරමිප්පත්තා පඤ්චදීපානිදං ඵලං.

111. සබ්බවොසිතවොසානා කතකිච්චා අනාසවා,
පඤ්චදීපා මහාවීර පාදෙ වන්දති චක්ඛුම.

112. සතසහස්සෙ ඉතො කප්පෙ යං දීපමදදිං තදා,
දුග්ගතිං නාභිජානාමි පඤ්චදීපානිදං ඵලං.

113-115. කිලෙසා ඣාපිතා මය්හං -පෙ- කතං බුද්ධස්ස සාසනං.