31. විපස්සිස්ස භගවතො ලොකජෙට්ඨස්ස තාදිනො,
රථියං පටිපන්නස්ස කාරයන්තස්ස පාණිනො.

32. ඝරතො නික්ඛමිත්වාන අවක්කුජ්ජා නිප්පජ්ජ’හං
අනුකම්පකො ලොකනාථො සීසන්තෙ අක්කමී මම

33. අක්කමිත්වාන සිරසි අගමා ලොකනායකො
තෙන චිත්තප්පසාදෙන තුසිතං උපපජ්ජහං

34. කිලෙසා ඣාපිතා මය්හං -පෙ- විහරාමි අනාසවා.

35. ස්වාගතං වත මෙ ආසි -පෙ- කතං බුද්ධස්ස සාසනං.

36. පටිසම්භිදා චතස්සො ච -පෙ- කතං බුද්ධස්ස සාසනං.

37. චන්දභාගානදීතීරෙ අහොසිං කින්නරී තදා,
අද්දසං විරජං බුද්ධං සයම්භුං අපරාජිතං.

38. පසන්නචිත්තා සුමනා වෙදජාතා කතඤ්ජලී,
නළමාලං ගහෙත්වාන සයම්භුං අභිපූජයිං.

39. තෙන කම්මෙන සුකතෙන චෙතනාපණිධීහි ච,
ජහිත්වා කින්නරීදෙහං අගච්ඡිං තිදසං ගතිං.

40. ඡත්තිංසදෙවරාජූනං මහෙසිත්තමකාරයිං,
දසන්නං චක්කවත්තීනං මහෙසිත්තමකාරයිං,
සංවෙජෙත්වාන මෙ චිත්තං පබ්බජිං අනගාරියං.

41. චතුනවුතෙ ඉතො කප්පෙ යං පුප්ඵමභිපූජයිං,
දුග්ගතිං නාභිජානාමි පුප්ඵපූජායිදං ඵලං.

42. කිලෙසා ඣාපිතා මය්හං භවා සබ්බෙ සමූහතා,
සබ්බාසවා පරික්ඛීණා නත්ථිදානි පුනබ්භවො.

43. කිලෙසා ඣාපිතා මය්හං -පෙ- භවා සබ්බෙ සමූහතා,

44. ස්වාගතං වත මෙ ආසි -පෙ- කතං බුද්ධස්ස සාසනං.

45. පටිසම්භිදා චතස්සො ච -පෙ- කතං බුද්ධස්ස සාසනං.

46. නගරෙ බන්ධුමතියා බන්ධුමා නාම ඛත්තියො
තස්ස රඤ්ඤො අහුං භරියා එකජ්ඣං චාරයාමහං

47. රහොගතා නිසීදිත්වා එවං චින්තෙස’හං තදා,
“ආදාය ගමනීයං හි කුසලං නත්ථි මෙ කතං.

48. මහාභිතාපං කටුකං ඝොරරූපං සුදාරුණං,
නිරයං නූන ගච්ඡාමි එත්ථ මෙ නත්ථි සංසයො.”

49. රාජානං උපසඞ්කම්ම ඉදං වචනමබ්රවිං,
“එකං මෙ සමණං දෙහි භොජයිස්සාමි ඛත්තිය.”

50. අදාසි මෙ මහාරාජා සමණං භාවිතින්ද්රියං,
තස්ස පත්තං ගහෙත්වාන පරමන්නෙන පූරයිං.

51. පූරයිත්වා පරමන්නං ගන්ධාලෙපමකාසහං,
සහස්සග්ඝනකෙනෙව වත්ථයුගෙන ඡාදයිං.