1531. පබ්බතෙ හිමවන්තම්භි වාකචීරධරො අහං,
චඞ්කමඤ්ච සමාරූළ්හො නිසීදිං පාචිනාමුඛො.

1532. පබ්බතෙ සුගතං දිස්වා ඵුස්සං ඣානරතං තදා,
අඤ්ජලිං පග්ගහෙත්වාන රංස්යා චිත්තං පසාදයිං.

1533. ද්වෙනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි රංසිසඤ්ඤායිදං ඵලං.

1534. පටිසම්භිදා -පෙ- කතං බුද්ධස්ස සාසනං.

1535. පබ්බතෙ හිමවන්තම්භි ඛුරාජිනධරො අහං,
ඵුස්සං ජිනවරං දිස්වා ඵලහත්ථො ඵලං අදං.

1536. යමහං ඵලමදාසිං විප්පසන්නෙන චෙතසා,
භවෙ නිබ්බත්තමානම්හි ඵලං නිබ්බත්තතෙ මම.

1537. ද්වෙනවුතෙ ඉතො කප්පෙ යං ඵලං අදදිං අහං,
දුග්ගතිං නාභිජානාමි ඵලදානස්සිදං ඵලං.

1538. පටිසම්භිදා -පෙ- කතං බුද්ධස්ස සාසනං.

1539. පබ්බතෙ හිමවන්තම්භි වසාමි පණ්ණසන්ථරෙ,
ඵුස්සස්ස ධම්මං භණතො සද්දෙ චිත්තං පසාදයිං.

1540. ද්වෙනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පුඤ්ඤකම්මස්සිදං ඵලං.

1541. පටිසම්භිදා -පෙ- කතං බුද්ධස්ස සාසනං.

1542. විපස්සිස්ස භගවතො මහාබොධිමහො අහු,
පබ්බජ්ජූපගතො සන්තො උපගච්ඡිං මහං අහං.

1543. කුසුමොදකමාදාය බොධියා ඔකිරිං අහං,
“මොචයිස්සති නො මුත්තො නිබ්බාපෙස්සති නිබ්බුතො”.

1544. එකනවුතෙ ඉතො කප්පෙ යං බොධිමභිසිඤ්චයිං,
දුග්ගතිං නාභිජානාමි බොධිසිඤ්චායිදං ඵලං.

1545. තෙත්තිංසෙ වත්තමානම්හි කප්පෙ ආසුං ජනාධිපා,
උදකාසෙචනා නාම අට්ඨෙතෙ චක්කවත්තිනො.

1546. පටිසම්භිදා -පෙ- කතං බුද්ධස්ස සාසනං.

1547. පොක්ඛරවනං පවිට්ඨො භඤ්ජන්තො පදුමානහං,
අද්දසං ඵුස්සසම්බුද්ධං බත්තිංසවරලක්ඛණං.

1548. පදුමපුප්ඵං ගහෙත්වාන ආකාසෙ උක්ඛිපිං අහං,
පසන්නකම්මං කත්වාන පබ්බජිං අනගාරියං.

1549. පබ්බජිත්වාන කායෙන මනසා සංවුතෙන ච,
වචීදුච්චරිතං හිත්වා ආජීවං පරිසොධයිං.