1458. සෙට්ඨිපුත්තො තදා ආසිං සුඛුමාලො සුඛෙධිතො
උච්ඡඞ්ගෙ පාටලීපුප්ඵං කත්වා තං අභිසංහරිං.

1459. සුවණ්ණවණ්ණං සම්බුද්ධං ගච්ඡන්තං අන්තරාපණෙ,
කඤ්චනග්ඝියසඞ්කාසං ද්වත්තිංස වරලක්ඛණං.

1460. හට්ඨො හට්ඨෙන චිත්තෙන පුප්ඵෙන අභිපූජයිං,
තිස්සං ලොකවිදුං නාථං නරදෙවං නමස්සහං.

1461. ද්වෙනවුතෙ ඉතො කප්පෙ යං කම්මමකරිං තදා,
දුග්ගතිං නාභිජානාමි පුප්ඵපූජායිදං ඵලං.

1462. ඉතො තෙසට්ඨිකප්පම්හි අභිසම්මතනාමකො,
සත්තරතනසම්පන්නො චක්කවත්තී මහබ්බලො.

1463. පටිසම්භිදා -පෙ- කතං බුද්ධස්ස සාසනං.

1464. මිගලුද්දො පුරෙ ආසිං අරඤ්ඤෙ කානනෙ අහං,
තත්ථද්දසාසිං සම්බුද්ධං තිස්සං පවරලක්ඛණං.

1465. තස්සාහං අඤ්ජලිං කත්වා පක්කාමිං පාචිනාමුඛො,
අවිදූරෙ නිසින්නස්ස නියකෙ පණ්ණසන්ථරෙ.

1466. තතො මෙ අසනීපාතො මත්ථකෙ නිපතී තදා,
සො’හං මරණකාලම්හි අකාසිං පුනරඤ්ජලිං.

1467. ද්වෙනවුතෙ ඉතො කප්පෙ අඤ්ජලිං අකරිං තදා,
දුග්ගතිං නාභිජානාමි අඤ්ජලිස්ස ඉදං ඵලං.

1468. චතුපඤ්ඤාසකප්පම්හි මිගකෙතු සනාමකො,
සත්තරතනසම්පන්නො චක්කවත්තී මහබ්බලො.

1469. පටිසම්භිදා -පෙ- කතං බුද්ධස්ස සාසනං.

1470. පදුමුත්තරො නාම ජිනො සබ්බධම්මානපාරගූ,
දන්තො දන්තපරිවුතො නගරා නික්ඛමී ජිනො.

1471. නගරෙ හංසවතියා අහොසිං මාලිකො තදා,
යං තත්ථ උත්තමං පුප්ඵං තීණි පුප්ඵානි අග්ගහිං.

1472. අද්දසං විරජං බුද්ධං පටිමග්ගන්තරාපණෙ,
සො’හං දිස්වාන සම්බුද්ධං එවං චින්තෙසහං තදා:

1473. “කිම්මෙ ඉමෙහි පුප්ඵෙහි රඤ්ඤො උපනතෙහි මෙ,
ගාමං වා ගාමක්ඛෙත්තං වා සහස්සං වා ලභෙය්යහං.

1474. අදන්තදමකං ධීරං සබ්බසත්තසුඛාවහං,
ලොකනාථං පූජයිත්වා ලච්ඡාමි අමතං ධනං.”

1475. එවාහං චින්තයිත්වාන සකං චිත්තං පසාදයිං,
තීණි ලොහිතකෙ ගය්හ ආකාසෙ උක්ඛිපිං තදා.

1476. මයා උක්ඛිත්තමත්තම්හි ආකාසෙ පත්ථරිංසු තෙ,
ධාරිංසු මත්ථකෙ තත්ථ උද්ධංවණ්ටා අධොමුඛා.

1477. යෙ කෙචි මනුජා දිස්වා උක්කුට්ඨිං සම්පවත්තයුං,
දෙවතා අන්තලික්ඛම්හි සාධුකාරං පවත්තයුං: