1470. පදුමුත්තරො නාම ජිනො සබ්බධම්මානපාරගූ,
දන්තො දන්තපරිවුතො නගරා නික්ඛමී ජිනො.

1471. නගරෙ හංසවතියා අහොසිං මාලිකො තදා,
යං තත්ථ උත්තමං පුප්ඵං තීණි පුප්ඵානි අග්ගහිං.

1472. අද්දසං විරජං බුද්ධං පටිමග්ගන්තරාපණෙ,
සො’හං දිස්වාන සම්බුද්ධං එවං චින්තෙසහං තදා:

1473. “කිම්මෙ ඉමෙහි පුප්ඵෙහි රඤ්ඤො උපනතෙහි මෙ,
ගාමං වා ගාමක්ඛෙත්තං වා සහස්සං වා ලභෙය්යහං.

1474. අදන්තදමකං ධීරං සබ්බසත්තසුඛාවහං,
ලොකනාථං පූජයිත්වා ලච්ඡාමි අමතං ධනං.”

1475. එවාහං චින්තයිත්වාන සකං චිත්තං පසාදයිං,
තීණි ලොහිතකෙ ගය්හ ආකාසෙ උක්ඛිපිං තදා.

1476. මයා උක්ඛිත්තමත්තම්හි ආකාසෙ පත්ථරිංසු තෙ,
ධාරිංසු මත්ථකෙ තත්ථ උද්ධංවණ්ටා අධොමුඛා.

1477. යෙ කෙචි මනුජා දිස්වා උක්කුට්ඨිං සම්පවත්තයුං,
දෙවතා අන්තලික්ඛම්හි සාධුකාරං පවත්තයුං:

1478. “අච්ඡෙරං ලොකෙ උප්පන්නං බුද්ධසෙට්ඨස්ස වාහසා,
සබ්බෙ ධම්මං සුණිස්සාම පුප්ඵානං වාහසා මයං.”

1479. පදුමුත්තරො ලොකවිදූ ආහුතීනං පටිග්ගහො,
වීථියං හි ඨිතො සත්ථා ඉමා ගාථා අභාසථ:

1480. “යො සො බුද්ධං අපූජෙසි රත්තපද්මෙහි මාණවො,
තමහං කිත්තයිස්සාමි සුණොථ මම භාසතො.

1481. තිංස කප්පසහස්සානි දෙවලොකෙ රමිස්සති,
තිංස කප්පානි දෙවින්දො දෙවරජ්ජං කරිස්සති.

1482. මහාවිත්ථාරිකං නාමං ව්යම්හං හෙස්සති තාවදෙ,
තියොජනසතුබ්බෙධං දියඩ්ඪසතවිත්ථතං.

1483. චත්තාරි සතසහස්සානි නිය්යුහා ච සුමාපිතා,
කූටාගාරවරූපෙතා මහාසයනවොසිතා.

1484. කොටිසතසහස්සායො පරිවාරෙස්සන්ති අච්ඡරා,
කුසලා නච්චගීතස්ස වාදිතෙපි පදක්ඛිණා

1485. එතාදිසෙ ව්යම්හවරෙ නාරීගණසමාකුලෙ,
වස්සිස්සති පුප්ඵවස්සො දිබ්බො ලොහිතකො සදා.

1486. භිත්තිඛීලෙ නාගදන්තෙ ද්වාරබාහාය තොරණෙ,
චක්කමත්තා ලොහිතකා ඔලම්බිස්සන්ති තාවදෙ.

1487. පතෙතන පත්තසඤ්ඡන්නෙ අන්තොව්යම්හවරෙ ඉධ,
අත්ථරිත්වා පාරුපිත්වා තුවට්ටිස්සන්ති තාවදෙ.

1488. භවනං පරිවාරෙත්වා සමන්තා සතයොජනං,
තෙ විසුද්ධා ලොහිතකා දිබ්බගන්ධං පවායරෙ.

1489. පඤ්චසත්තතික්ඛත්තුඤ්ච චක්කවත්තී භවිස්සති,
පදෙසරජ්ජං විපුලං ගණනාතො අසංඛියං.

1490. සම්පත්තියො දුවෙ භුත්වා අනීති අනුපද්දවො,
සම්පත්තෙ පරියොසානෙ නිබ්බානං ඵස්සයිස්සති.”

1491. සුදිට්ඨො වත මෙ බුද්ධො වාණිජ්ජං සුප්පයොජිතං,
පද්මානි තීණි පූජෙත්වා අනුභොසිං තිසම්පදං.

1492. අජ්ජ මෙ ධම්මප්පත්තස්ස විප්පමුත්තස්ස සබ්බසො,
සුපුප්ඵිතං ලොහිතකං ධාරයිස්සති මත්ථකෙ.