1416. අභීතරූපං සීහංව අභිජාතංව කෙසරිං,
ව්යග්ඝූසභංව පවරං ගරුළග්ගංව පක්ඛිනං.

1417. සිඛිං තිලොකසරණං අනෙජං අපරාජිතං,
නිසින්නං සමණානග්ගං භික්ඛුසංඝපුරක්ඛතං.

1418. වඞ්ගොටකෙ ඨපෙත්වාන අනොජං පුප්ඵමුත්තමං,
සහ චඞ්ගොටකොනෙව බුද්ධසෙට්ඨං සමොකිරිං.

1419. තෙන චිත්තප්පසාදෙන දිපදින්දෙ නරාසභෙ
පත්තො’ම්භි අචලං ඨානං හිත්වා ජයපරාජයං.

1420. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි බුද්ධපූජායිදං ඵලං.

1421. සම්පුණ්ණෙ තිංසකප්පම්භි දෙවභූතිසනාමකා,
සත්තරතනසම්පන්නො පඤ්චාසුං චක්කවත්තිනො.

1422. පටිසම්භිදා -පෙ- කතං බුද්ධස්ස සාසනං.

සකවින්තී අවොපුප්ඵි පච්චාභිගමනෙන ච
පරප්පසාදී භිසදො සුචින්තී වත්ථදායකො
අම්බදායී ච සුමනො පුප්ඵචඞ්ගොටියො’පි ච
ගාථෙකසත්තතී වුත්තා ගණිතා අත්ථදස්සිහි.

1423. ආපාටලිං අහං පුප්ඵං උච්චිතස්මිං මහාපථෙ,
ඵූපම්භි අභිරොපෙසිං සිඛිනො ලොකබන්ධුනො.

1424. එකතිංසෙ ඉතො කප්පෙ යං කම්මමකරිං තදා,
දුග්ගතිං නාභිජානාමි ථූපපූජායිදං ඵලං.

1425. ඉතො පණ්ණරසෙ කප්පෙ භූමියො නාම ඛත්තියො,
සත්තරතනසම්පන්නො චක්කවත්තී මහබ්බලො.

1426 පටිසම්භිදා -පෙ- කතං බුද්ධස්ස සාසනං.

1427. අක්කන්තං ච පදං දිස්වා තිස්සස්සාදිච්චබන්ධුනො.
හට්ඨො හට්ඨෙන චිත්තෙන පාදෙ චිත්තං පසාදයිං.

1428. දෙවනවුතෙ ඉතො කප්පෙ යං සඤ්ඤමලභිං තදා,
දුග්ගතිං නාභිජානාමි පදසඤ්ඤායිදං ඵලං.

1429. ඉතො සත්තමකෙ කප්පෙ සුමෙධො නාම ඛත්තියො,
සත්තරතනසම්පන්නො චක්කවත්තී මහබ්බලො.

1430 පටිසම්භිදා -පෙ- කතං බුද්ධස්ස සාසනං.