1323. චතුසච්චං පකාසෙන්තො වරධම්මප්පවත්තකො,
වස්සතෙ අමතං වුට්ඨිං නිබ්බාපෙන්තො මහාජනං.

1324. සදණ්ඩං පදුමං ගය්හ අඩ්ඪකොසෙ ඨිතො අහං,
පදුමුත්තරමුනිස්ස හට්ඨො උක්ඛිපිමම්බරෙ.

1325. ආගච්ඡන්තෙ ච පදුමෙ අබ්භුතො ආසි තාවදො,
මම සඞ්කප්පමඤ්ඤාය පග්ගණ්හි වදතං වරො.

1326. කරසෙට්ඨෙන පග්ගය්හ ජලජං පුප්ඵමුත්තමං,
භික්ඛුසංඝෙ ඨිතො සත්ථා ඉමා ගාථා අභාසථ:

1327. “යෙනිදං පදුමං ඛිත්තං සබ්බඤ්ඤූම්හි විනායකෙ,
තමහං කිත්තයිස්සාමි සුණාථ මම භාසතො.

1328. තිංස කප්පානි දෙවින්දො දෙවරජ්ජං කරිස්සති,
පථව්යා රජ්ජං සත්තසතං වසුධං ආවසිස්සති.

1329. තත්ථ පත්තං ගණෙත්වාන චක්කවත්තී භවිස්සති,
ආකාසතො පුප්ඵවුට්ඨි අභිවස්සිස්සති තදා.

1330. කප්පසතසහස්සම්හි ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

1331. තස්ස ධම්මෙසු දායාදො ඔරසො ධම්මනිම්මිතො,
සබ්බාසවෙ පරිඤ්ඤාය නිබ්බායිස්සතනාසවො.”

1332. නික්ඛමිත්වාන කුච්ඡිම්හා සම්පජානො පතිස්සතො,
ජාතියා පඤ්චවස්සො’හං අරහත්තමපාපුණිං.

1333 පටිසම්භිදා -පෙ- කතං බුද්ධස්ස සාසනං.

1334. ජාතියා සත්තවස්සො’හං අද්දසං ලොකනායකං,
පසන්නචිත්තො සුමනො උපගච්ඡිං නරුත්තමං.

1335. තිස්සස්සාහං භගවතො ලොකජෙට්ඨස්ස තාදිනො,
හට්ඨො හට්ඨෙන චිත්තෙන රොපයිං බොධිමුත්තං.

1336. අසනො නාමධෙය්යෙන ධරණීරුහපාදපො,
පඤ්ච වස්සෙ පරිචරිං අසනං බොධිමුත්තමං.

1337. පුප්ඵිතං පාදපං දිස්වා අබ්භුතං ලොමහංසනං,
සකං කම්මං පකිත්තෙන්තො බුද්ධසෙට්ඨං උපාගමිං.

1338. තිස්සො තදා සො සම්බුද්ධො සයම්භූ අග්ගපුග්ගලො,
භික්ඛුසංඝෙ නිසීදිත්වා ඉමා ගාථා අභාසථ:

1339. “යෙනායං රොපිතා බොධි බුද්ධපූජා ච සක්කතා,
තමහං කිත්තයිස්සාමි සුණාථ මම භාසතො.

1340. තිංස කප්පානි දෙවෙසු දෙවරජ්ජං කරිස්සති,
චතුසට්ඨික්ඛත්තුං සො චක්කවත්තී භවිස්සති.

1341. තුසිතා හි චවිත්වාන සුක්කමූලෙන චොදිතො,
ද්වෙ සම්පත්ති අනුභොත්වා මනුස්සත්තෙ රමිස්සති.

1342. පධානපහිතත්තො සො උපසන්තො නිරූපධි,
සබ්බාසවෙ පරිඤ්ඤාය නිබ්බායිස්සතනාසවො.”