6294. ඉමම්හි භද්දකෙ කප්පෙ බ්රහ්මබන්ධු මහායසො,
කස්සපො නාම නාමෙන උප්පජ්ජි වදතං වරො.

6295. අනුව්යඤ්ජනසම්පන්නො බත්තිංසවරලක්ඛණො,
බ්යාමප්පභාපරිවුතො රංසිජාලසමොත්ථතො.

6296. අස්සාසෙතා යථා චන්දො සුරියොව පභඞ්කරො,
නිබ්බාපෙතා යථා මෙඝො සාගරොව ගුණාකරො.

6297. ධරණීරිව සීලෙන හිමවාව සමාධිනා,
ආකාසො විය පඤ්ඤාය අසඞ්ගො අනිලො යථා.

6298. තදාහං බාරාණසියං උපපන්නො මහාකුලෙ,
පහූතධනධඤ්ඤස්මිං නානාරතනසඤ්චයෙ.

6299. මහතා පරිවාරෙන නිසින්නං ලොකනායකං,
උපෙච්ච ධම්මමස්සොසිං අමතංව මනොහරං.

6300. බත්තිංසලක්ඛණධරො සනක්ඛත්තොව චන්දිමා,
අනුව්යඤ්ජනසම්පන්නො සාලරාජාව ඵුල්ලිතො.

6301. රංසිජාලපරික්ඛිත්තො දිත්තොව කනකාචලො,
බ්යාමප්පභාපරිවුතො සරස්මීව දිවාකරො.

6302. සොණ්ණානනො ජිනවරො සමණීව සිලුච්චයො,
කරුණාපුණ්ණහදයො ගුණෙන විය සාගරො.

6303. ලොකවිස්සුතකිත්තී ච සිනෙරූව නගුත්තමො,
යසසා විත්ථතො වීරො ආකාසසදිසො මුනි.

6304. අසඞ්ගචිත්තො සබ්බත්ථ අනිලො විය නායකො,
පතිට්ඨා සබ්බභූතානං මහීව මුනි සත්තමො.

6305. අනුපලිත්තො ලොකෙන තොයෙන පදුමං යථා,
කුවාදගච්ඡදහනො අග්ගික්ඛන්ධොව සොභති.

6306. අගදො විය සබ්බත්ථ කිලෙසවිසනාසකො,
ගන්ධමාදනසෙලොව ගුණගන්ධවිභුසිතො.

6307. ගුණානං ආකරො වීරො රතනානංව සාගරො,
සින්ධූව වනරාජීනං කිලෙසමලහාරකො.

6308. විජයීව මහායොධො මාරසෙනප්පමද්දතො,
චක්කවත්තීව සො රාජා බොජ්ඣඞ්ගරතනිස්සරො.

6309. මහාභිසක්කසඞ්කාසො දොසව්යාධිතිකිච්ඡකො,
සල්ලකත්තො යථා සෙට්ඨො දිට්ඨිගණ්ඩවිඵාලකො.

6310. සො තදා ලොකපජ්ජොතො සනරාමරසක්කතො,
පරිසාසු නරාදිච්චො ධම්මං දෙසයතෙ ජිනො.

6311. දානං දත්වා මහාභොගො සීලෙන සුගතූපගො,
භාවනාය ච නිබ්බාති ඉච්චෙවමනුසාසථ.

6312. දෙසනං තං මහස්සාදං ආදිමජ්ඣන්තසොභනං,
සුණන්ති පරිසා සබ්බා අමතංව මහාරසං.

6313. සුත්වා සුමධුරං ධම්මං පසන්නො ජිනසාසනෙ,
සුගතං සරණං ගන්ත්වා යාවජීවං නමස්සහං.

6314. මුනිනො ගන්ධකුටියා ඔපුඤ්ඡෙසිං තදා මහිං,
චතුජ්ජාතෙන ගන්ධෙන මාසෙ අට්ඨදිනෙස්වහං.

6315. පණිධාය සුගන්ධත්තං සරීරස්ස දුගන්ධිනො,
තදා ජිනො වියාකාසි සුගන්ධතනුලාභිතං.

6316. යො යං ගන්ධකුටිභූමිං ගන්ධෙනොපුඤ්ඡතෙ’සකිං,
තෙන කම්මවිපාකෙන උපපන්නො තහිං තහිං.

6317. සුගන්ධදෙහො සබ්බත්ථ භවිස්සති අයං නරො,
ගුණගන්ධයුතො හුත්වා නිබ්බායිස්සතනාසවො.

6318. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.

6319. පච්ඡිමෙ ච භවෙ දානි ජාතො විප්පකුලෙ අහං,
ගබ්භෙ මෙ වසතො මාතා දෙහෙනාසි සුගන්ධිකා.

6320. යදා ච මාතුකුච්ඡිම්හා නික්ඛමාමි තදා පුරී,
සාවත්ථි සබ්බගන්ධෙහි වාසිතා විය වායථ.

6321. පුප්ඵවස්සං ච සුරභි දිබ්බගන්ධමනොරමං,
ධූපානි ච මහග්ඝානි උපවායිංසු තාවදෙ.

6322. දෙවා ච සබ්බගන්ධෙහි ධුපපුප්ඵෙහි තං ඝරං,
වාසයිංසු සුගන්ධෙන යස්මිං ජාතො අහං ඝරෙ.