5956. පදුමුත්තරො නාම ජිනො සබ්බලොකවිදූ මුනි,
ඉතො සතසහස්සම්හි කප්පෙ උප්පජ්ජි චක්ඛුමා.

5957. ඔවාදකො විඤ්ඤාපකො තාරකො සබ්බපාණිනං,
දෙසනාකුසලො බුද්ධො තාරෙසි ජනතං බහුං.

5958. අනුකම්පකො කාරුණිකො හිතෙසී සබ්බපාණිනං,
සම්පත්තෙ තිත්ථියෙ සබ්බෙ පඤ්චසීලෙ පතිට්ඨපි.

5959. එවං නිරාකුලං ආසි සුඤ්ඤකං තිත්ථියෙහි ච,
විචිත්තං අරහන්තෙහි වසීභූතෙහි තාදිහි.

5960. රතනානට්ඨපඤ්ඤාසං උග්ගතො සො මහාමුනි,
කඤ්චනග්ඝියසඞ්කාසො බත්තිංසවරලක්ඛණො.

5961. වස්සසතසහස්සානි ආයු විජ්ජති තාවදෙ,
තාවතා තිට්ඨමානො සො තාරෙසි ජනතං බහුං.

5962. තදාහං හංසවතියං බ්රාහ්මණො මන්තපාරගූ,
උපෙච්ච තං නරවරං අස්සොසිං ධම්මදෙසනං.

5963. පඤ්ඤාපෙන්තං මහාවීරං පරිසාසු විසාරදං,
පටිභාණෙය්යකං භික්ඛුං එතදග්ගෙ විනායකං.

5964. තදාහං කාරං කත්වාන සසඞ්ඝෙ ලොකනායකෙ,
නිපච්ච සිරසා පාදෙ තං ඨානමභිපත්ථයිං.

5965. තතො මං භගවා ආහ සිඞ්ගීනික්ඛසමප්පභො,
සරෙන රජනීයෙන කිලෙසමලහාරිනා.

5966. “සුඛී භවස්සු දීඝායු සිජ්ඣතං පණිධී තව,
සසඞ්ඝෙ මෙ කතං කාරං අතීව විපුලං තයා.

5967. සතසහස්සෙ ඉතො කප්පෙ ඔක්කාකකුලසම්භවො,
ගොතමො නාම නාමෙන සත්ථා ලොකෙ භවිස්සති.

5968. තස්ස ධම්මෙසු දායාදො ඔරසො ධම්මනිම්මිතො,
රාධොති නාමධෙය්යෙන හෙස්සති සත්ථුසාවකො.

5969. ස තෙ හෙතුගුණෙ තුට්ඨො සක්යපුත්තො නරාසභො,
පටිභාණෙය්යකානග්ගං පඤ්ඤාපෙස්සති නායකො.”

5970. තං සුත්වා මුදිතො හුත්වා යාවජීවං තදා ජිනං,
මෙත්තචිත්තො පරිචරිං සතො පඤ්ඤාසමාහිතො.

5971. තෙන කම්මෙන සුකතෙන චෙතනාපණිධීහි ච,
ජහිත්වා මානුසං දෙහං තාවතිංසමගච්ඡහං.